தமிழக வெற்றிக் கழகத்தின் (TVK) தலைவரும், நடிகருமான விஜய், தனது தேர்தல் வேட்புமனுக்களில் சொத்து விபரங்களை மறைத்துக் காட்டியுள்ளதாகத் தொடரப்பட்ட வழக்கில், சென்னை உயர்நீதிமன்றம் வருமான வரித்துறைக்கு முக்கிய உத்தரவைப் பிறப்பித்துள்ளது. இது தொடர்பான விளக்கத்தை ஒரு வார காலத்திற்குள் தாக்கல் செய்ய நீதிமன்றம் அறிவுறுத்தியுள்ளது.
பெரம்பூரைச் சேர்ந்த வாக்காளர் விக்னேஷ் என்பவர் தாக்கல் செய்துள்ள மனுவில், விஜய் தாக்கல் செய்த இரு வேறு வேட்புமனுக்களில் உள்ள சொத்து விபரங்களில் பாரிய முரண்பாடுகள் இருப்பதாகக் குறிப்பிட்டுள்ளார்.
பெரம்பூர் தொகுதி வேட்புமனு இதில் தனது சொத்து மதிப்பு ரூ. 115.13 கோடி எனக் குறிப்பிட்டுள்ளார்.
திருச்சி கிழக்கு தொகுதி வேட்புமனு அதே காலப்பகுதியில் தாக்கல் செய்யப்பட்ட இந்த மனுவில், சொத்து மதிப்பு ரூ. 220.15 கோடி எனக் குறிப்பிட்டுள்ளார்.
ஒரே நேரத்தில் தாக்கல் செய்யப்பட்ட இரு மனுக்களுக்கு இடையே சுமார் ரூ. 105 கோடி வித்தியாசம் இருப்பது பெரும் முறைகேடு எனவும், திட்டமிட்டே இந்தத் தகவல்கள் மறைக்கப்பட்டுள்ளதாகவும் மனுதாரர் குற்றம் சாட்டியுள்ளார்.
இந்த மனுவை இன்று (ஏப்ரல் 20) விசாரித்த தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள் முருகன் அடங்கிய அமர்வு, "சுமார் 100 கோடி ரூபாய் வரையிலான சொத்து விபரங்கள் மறைக்கப்பட்டிருப்பது ஒரு முறைகேடு (Irregularity)" என வாய்மொழியாகக் குறிப்பிட்டனர்.
இதனைத் தொடர்ந்து:
வருமான வரித்துறைக்கு (DGIT): இந்த முரண்பாடுகள் குறித்து விரிவான விசாரணை நடத்தி, ஒரு வாரத்திற்குள் பதிலளிக்க உத்தரவிடப்பட்டுள்ளது.
தேர்தல் ஆணையத்திற்கு: இது குறித்து உரிய விளக்கம் அளிக்க நோட்டீஸ் அனுப்பப்பட்டுள்ளது.
தமிழக சட்டமன்றத் தேர்தல் வாக்குப்பதிவு வரும் ஏப்ரல் 23-ஆம் திகதி நடைபெற உள்ள நிலையில், கட்சியின் தலைவரான விஜய்க்கு எதிராக எழுந்துள்ள இந்தச் சொத்து விபர சர்ச்சை அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.
ஏற்கனவே துணை முதல்வர் உதயநிதி ஸ்டாலினின் சொத்து விபரங்கள் குறித்தும் வழக்கு நிலுவையில் உள்ள நிலையில், விஜய்யின் இந்த விவகாரமும் தேர்தல் முடிவுகளில் தாக்கத்தை ஏற்படுத்துமா என்ற கேள்வி எழுந்துள்ளது.
வருமான வரித்துறையின் அறிக்கை தாக்கல் செய்யப்பட்ட பின்னரே, விஜய்யின் வேட்புமனுவின் தகுதி குறித்து அடுத்தகட்ட முடிவுகள் தெரியவரும்.