தமிழக அரசியல் வரலாற்றில் நீண்ட இடைவெளிக்குப் பிறகு, தற்போதைய முதல்வர் முன்னாள் முதல்வரை நேரில் சந்திக்கும் ஒரு நாகரிகமான நிகழ்வு அரங்கேறியுள்ளது. தமிழகத்தின் புதிய முதல்வராகப் பொறுப்பேற்றுள்ள சி. ஜோசப் விஜய், முன்னாள் முதல்வர் மு.க. ஸ்டாலினை நேரில் சந்தித்து வாழ்த்துப் பெற்றார்.
தமிழக அரசியலில் இதுபோன்ற ஒரு நிகழ்வு கடைசியாக 59 ஆண்டுகளுக்கு முன்பு நடைபெற்றது.
1967-ல்: காங்கிரஸ் கட்சியை வீழ்த்தி தி.மு.க வெற்றி பெற்றபோது, முதல்வராகப் பதவியேற்ற சி.என். அண்ணாதுரை, ஆளுநர் மாளிகையில் நடைபெற்ற விருந்தில் பதவியிழந்த முன்னாள் முதல்வர் எம். பக்தவத்சலத்தை சந்தித்து உரையாடினார்.
இருவரும் அருகருகே அமர்ந்து உணவு அருந்தியதுடன், பின்னர் பக்தவத்சலம் மற்றும் காமராஜர் ஆகியோரையும் அண்ணா நேரில் சந்தித்து ஆலோசனைகளைப் பெற்றார்.
அண்ணாவிற்குப் பிறகு தமிழக அரசியலில் ஒரு கசப்பான சூழல் நிலவியது. மு. கருணாநிதி, எம்.ஜி.ஆர், ஜெயலலிதா முதல் அண்மைய எடப்பாடி பழனிசாமி வரை எந்த ஒரு முதல்வரும், தங்களுக்கு முன்னால் பதவியில் இருந்தவரை நேரில் சந்திக்கும் மரபைக் கடைப்பிடிக்கவில்லை. தேர்தல் கால அரசியல் பகமை, பதவியேற்ற பின்பும் தொடரும் நிலையே நீடித்து வந்தது.
தற்போது நடந்து முடிந்த தேர்தலில் வெற்றி பெற்று முதல்வராகப் பொறுப்பேற்றுள்ள சி. ஜோசப் விஜய், இந்த நீண்டகாலத் தடையை உடைத்துள்ளார். முன்னாள் முதல்வர் மு.க. ஸ்டாலினைச் சந்தித்து அவர் வாழ்த்துப் பெற்றது அரசியல் வட்டாரங்களில் நெகிழ்ச்சியை ஏற்படுத்தியுள்ளது.
முன்னாள் முதல்வர் மு.க. ஸ்டாலின் இது குறித்துத் தனது 'X' தளத்தில் பதிவிட்டுள்ளதாவது: "தமிழ்நாடு முதல்வராகப் பொறுப்பேற்றுள்ள விஜய், அரசியல் நாகரிகத்துடன் என்னைச் சந்தித்து வாழ்த்து பெற்றார். அவருக்கு என் அன்புநிறை வாழ்த்துகளையும், ஆலோசனைகளையும் வழங்கினேன்."
தமிழக அரசியலில் நிலவி வந்த "பழிவாங்கும் அரசியல்" அல்லது "பேசாத கலாச்சாரம்" மறைந்து, ஒரு ஆரோக்கியமான ஜனநாயக அரசியல் நாகரிகம் மீண்டும் துளிர்விட்டுள்ளதாக சமூக ஆர்வலர்கள் கருதுகின்றனர்.
