தமிழக சட்டப்பேரவைத் தேர்தல் முடிவுகள் வெளியான நிலையில், சென்னை கொளத்தூர் தொகுதியில் தவெக வேட்பாளரிடம் தோல்வியைத் தழுவிய போதிலும், தனக்கு வாக்களித்த மக்களுக்கு நன்றி தெரிவிக்க திமுக தலைவர் மு.க. ஸ்டாலின் இன்று தொகுதிக்கு வருகை தந்தார்.
நேற்று தேர்தல் முடிவுகள் அறிவிக்கப்பட்ட நிலையில், மற்ற தலைவர்களை விட முதலாளாக இன்று (மே 5) மாலை 5.45 மணியளவில் மு.க. ஸ்டாலின் கொளத்தூர் தொகுதிக்கு வருகை தந்தார். தனது பிரசார வாகனத்தில் வீதி வீதியாகச் சென்று வாக்காளர்களைச் சந்தித்தார்.
தோல்வியடைந்த வருத்தத்திலும், தன்னை நம்பி வாக்களித்த மக்களுக்கு நன்றி சொல்ல வந்த ஸ்டாலினுக்கு திமுகவினர் மற்றும் பொதுமக்கள் ஆயிரக்கணக்கானோர் திரண்டு வந்து உற்சாக வரவேற்பு அளித்தனர்.
மு.க. ஸ்டாலினுடன் வாகனத்தில் முன்னாள் அமைச்சர் பி.கே. சேகர்பாபு உடன் இருந்தார்.
மக்கள் அளித்த வரவேற்பைப் பார்த்த மு.க. ஸ்டாலின், நெகிழ்ச்சியில் கண்கலங்கியபடியே கைகூப்பி நன்றி தெரிவித்தார்.
ஆயிரக்கணக்கான தொண்டர்கள் "தலைவரே" என முழக்கமிட்டு அவருக்கு ஆதரவு தெரிவித்தனர்.
தமிழக அரசியலில் மிக முக்கியமான தொகுதியாகக் கருதப்பட்ட கொளத்தூரில், இந்த முறை பெரும் மாற்றம் நிகழ்ந்துள்ளது.
வெற்றி பெற்றவர் வி.எஸ். பாபு (தவெக)
வாக்கு எண்ணிக்கை 18 சுற்றுகள்
ஸ்டாலினின் முன்னிலை ஒரே ஒரு சுற்றில் மட்டுமே முன்னிலை
தபால் வாக்குகள் தபால் வாக்குகளிலும் ஸ்டாலின் பின்னடைவு
மூன்று முறை இதே தொகுதியில் வெற்றி பெற்றிருந்த மு.க. ஸ்டாலின், இந்த முறை தவெக வேட்பாளர் வி.எஸ். பாபுவிடம் தோல்வியடைந்தது திமுகவினரிடையே பெரும் அதிர்ச்சியை ஏற்படுத்தியுள்ளது. இருப்பினும், தேர்தல் முடிவு வெளியான அடுத்த நாளே தொகுதிக்கு வந்து மக்களைச் சந்தித்த அவரது செயல் அரசியல் வட்டாரத்தில் கவனத்தைப் பெற்றுள்ளது.
