தமிழக அரசியல் வரலாற்றில் ஒரு முக்கிய மைல்கல்லாக, திமுக கூட்டணியில் இருந்து விலகி, விஜய் தலைமையிலான தமிழக வெற்றிக் கழகத்துடன் (தவெக) காங்கிரஸ் கட்சி புதிய கூட்டணியை அறிவித்துள்ளது. இதன் மூலம் சுமார் 60 ஆண்டுகளுக்குப் பிறகு தமிழக அமைச்சரவையில் காங்கிரஸ் மீண்டும் இடம் பெறவுள்ளது.
தேர்தல் அறிவிக்கப்பட்ட காலத்திலிருந்தே திமுக - காங்கிரஸ் இடையே கூட்டணி குறித்த சலுக்சலப்புகள் நீடித்து வந்தன. ராகுல் காந்திக்கு இந்தக் கூட்டணியில் உடன்பாடு இல்லை என்றும், தமிழக நிர்வாகிகளின் கட்டாயத்தினாலேயே 28 தொகுதிகளில் போட்டியிட ஒப்புக்கொண்டதாகவும் தகவல்கள் தெரிவிக்கின்றன.
தேர்தல் பிரசாரத்தின் போது பொன்னேரி கூட்டத்தில் ஸ்டாலின் பெயரை ராகுல் காந்தி குறிப்பிடாததும், புதுச்சேரி வருகையின் போது அவரைச் சந்திக்காததும் விரிசலை உறுதிப்படுத்தின.
சமீபத்தில் வெளியான தேர்தல் முடிவுகளில் தவெக 108 இடங்களில் வெற்றி பெற்று தனிப்பெரும் கட்சியாக உருவெடுத்தது. எனினும், பெரும்பான்மைக்குத் தேவையான 117 இடங்களுக்கு இன்னும் 9 இடங்கள் தேவைப்படும் நிலையில், 5 இடங்களில் வெற்றி பெற்றுள்ள காங்கிரஸ் தனது ஆதரவை தவெக-விற்கு வழங்கியுள்ளது.
ஆதரவு கடிதம்: காங்கிரஸ் மாநிலப் பொறுப்பாளர் கிரிஷ் சோடங்கர் தலைமையிலான நிர்வாகிகள், பனையூர் அலுவலகத்தில் விஜய்யைச் சந்தித்து 5 எம்.எல்.ஏ-க்களின் ஆதரவு கடிதத்தை வழங்கினர்.
நிபந்தனை: வரும் தேர்தல்களிலும் இந்தக் கூட்டணி தொடரும் என்றும், அதேசமயம் மதவாத சக்திகளுடன் எக்காலத்திலும் கூட்டணி வைக்கக்கூடாது என்றும் காங்கிரஸ் நிபந்தனை விதித்துள்ளது.
கூட்டணி ஆட்சி: "தவெகவுடன் கூட்டணியில் சேரும் கட்சிகளுக்கு ஆட்சியிலும் பங்கு உண்டு" என்ற விஜய்யின் வாக்குறுதிப்படி, காங்கிரஸுக்கு ஒரு அமைச்சர் பதவி வழங்கப்பட உள்ளது.
கூட்டணி அமைச்சரவையில் காங்கிரஸைச் சேர்ந்த ஒரு பெண் உறுப்பினருக்கு அமைச்சர் பதவி வழங்க ஆலோசனை நடைபெற்று வருகிறது. அந்த வகையில், குளச்சல் தொகுதியில் வெற்றி பெற்ற தாரகை கியூத்பெர்ட் தமிழக அமைச்சரவையில் இடம் பெற அதிக வாய்ப்புள்ளதாகக் கூறப்படுகிறது.
தவெக (108) மற்றும் காங்கிரஸ் (5) என மொத்தம் 113 இடங்கள் தற்போது உறுதியாகியுள்ளன. பெரும்பான்மைக்கு இன்னும் 4 இடங்கள் தேவைப்படுவதால், விசிக மற்றும் இந்திய கம்யூனிஸ்ட் போன்ற கட்சிகளுடன் தவெக பேச்சுவார்த்தை நடத்தி வருவதாகத் தெரிகிறது.
இந்தக் கூட்டணி ஆட்சி அமையும் பட்சத்தில், 1967-க்குப் பிறகு தமிழகத்தில் காங்கிரஸ் கட்சி நேரடியாக ஆட்சியில் பங்கேற்பது இதுவே முதல் முறையாகும். விஜய்யின் இந்த "அதிகாரத்தில் பங்கு" என்ற வியூகம் தமிழக அரசியலில் புதிய சகாப்தத்தைப் படைத்துள்ளது.
