உலகெங்கும் இன்று (ஜூன் 5) உலக சுற்றுச்சூழல் நாள் கொண்டாடப்பட்டு வரும் வேளையில், ஒட்டுமொத்த மனிதகுலத்திற்கும் பெரும் அதிர்ச்சியூட்டும் தகவலாக 'எல் நினோ' (El Niño) விளைவுகள் அதிகாரப்பூர்வமாகத் தொடங்கிவிட்டதாக ஐரோப்பிய வானிலை ஆய்வு மையம் அறிவித்துள்ளது.
பசிபிக் பெருங்கடலின் மேற்பரப்பு நீரின் வெப்பநிலை தொடர்ந்து அபாயகரமான முறையில் அதிகரித்து வருவதை அடுத்து, இந்த குறுகிய கால வானிலை முன்னறிவிப்பு எச்சரிக்கையை அந்த மையம் வெளியிட்டுள்ளது.
பசிபிக் கடலின் மத்திய மற்றும் கிழக்கு நிலநடுக்கோட்டுப் பகுதியில், கடல் மேற்பரப்பு நீரின் வெப்பநிலை வழக்கத்தை விட அதிகமாக அதிகரிப்பதே 'எல் நினோ' எனப்படுகிறது. இந்த நிகழ்வு உலகளாவிய வானிலை மாற்றங்களுக்கும், வறட்சி மற்றும் கடுமையான வெள்ள பாதிப்புகளுக்கும் வழிவகுக்கும்.
மே தொடக்கத்தில் முதல் எச்சரிக்கை: கடந்த மே மாதத் தொடக்கத்திலேயே, பசிபிக் கடல் நீரின் மேற்பரப்பு வெப்பம் அதன் எல்லையான 0.5 டிகிரி சென்டிகிரேடைத் தொட்டது. இதனால் எல் நினோ உருவானதாக முதற்கட்ட அறிவிப்பு வெளியானது.
மே இறுதியில் மேலும் அதிகரிப்பு: பல்வேறு உலகளாவிய வானிலை ஆய்வு மையங்கள் எச்சரித்தபடியே மே மாத இறுதியில் இந்த வெப்ப அளவு மேலும் அதிகரித்தது.
ஆஸ்திரேலியா வெளியிட்ட தரவு: கடந்த மே 24ஆம் தேதி நிலவரப்படி, பசிபிக் கடல் மேற்பரப்பு வெப்பநிலை மேலும் உயர்ந்து 0.67 டிகிரி சென்டிகிரேடாக பதிவாகியிருந்ததாக ஆஸ்திரேலிய வானிலை ஆய்வு மையம் தெரிவித்திருந்தது.
இன்று உலக சுற்றுச்சூழல் நாள் விழிப்புணர்வு பிரச்சாரங்கள் நடந்து வரும் நிலையில், ஐரோப்பிய வானிலை ஆய்வு மையம் வெளியிட்டுள்ள புதிய தரவுகள் உலக நாடுகளைக் கவலையில் ஆழ்த்தியுள்ளன.
இன்றைய நிலவரப்படி பசிபிக் கடலின் நீர்மேற்பரப்பு வெப்பம் தொடர்ந்து அதிகரித்து வருவது, எல் நினோ விளைவுகள் முழு வீச்சில் தொடங்கிவிட்டதற்கான மிகத் தெளிவான அறிகுறி என்று ஐரோப்பிய வானிலை ஆய்வு மையம் உறுதிபடத் தெரிவித்துள்ளது.
இதன் காரணமாக உலக நாடுகளில் பருவமழை பொய்த்தல், கடுமையான கோடை வெப்பம், உணவு உற்பத்திப் பற்றாக்குறை மற்றும் சில பகுதிகளில் வழக்கத்திற்கு மாறான தீவிரப் புயல்கள் போன்ற இயற்கைச் சீற்றங்கள் ஏற்பட வாய்ப்புள்ளதாக சுற்றுச்சூழல் ஆர்வலர்கள் எச்சரிக்கின்றனர்.
