தென்மேற்கு பிரான்ஸ் மற்றும் மத்திய ஸ்பெயின் வனப்பகுதிகளில் ஏற்பட்டுள்ள மிகப்பெரிய காட்டுத்தீ மிக வேகமாகப் பரவி வருகிறது. இதன்காரணமாக, இரு நாடுகளிலும் இதுவரை 2 லட்சத்துக்கும் அதிகமான மக்கள் பாதுகாப்பான இடங்களுக்கு வெளியேற்றப்பட்டுள்ளனர் என அந்நாட்டு உள்துறை அமைச்சகங்கள் தெரிவித்துள்ளன.

அதிக வெப்பநிலை, பருவநிலை மாற்றம் மற்றும் பலத்த காற்று காரணமாகத் தீயைக் கட்டுப்படுத்துவதில் தீயணைப்பு வீரர்களுக்குக் கடும் சவால்கள் நிலவுகின்றன.

பிரான்ஸ் நிலவரம்: 1.41 லட்சம் பேர் வெளியேற்றம்

  • போர்டோ அருகே தீவிரம்: போர்டோக்ஸ் நகருக்குச் தென்மேற்கே லேஜ் கேப்-ஃபெரெட் வனப்பகுதியை நோக்கித் தீ நகர்ந்து வருகிறது. அட்லாண்டிக் கடற்கரைப் பகுதிகளைத் தீ சூழ்ந்ததால், சிலர் படகுகள் மூலமாகவும் தப்பிச் சென்றுள்ளனர்.

  • பிரான்ஸ் அமைச்சரின் அறிக்கை: பிரான்ஸ் உள்துறை அமைச்சர் லாரன்ட் நுனெஸ் கூறுகையில், கேப் ஃபெரெட் பகுதியில் காட்டுத்தீ 140 சதுர கிலோமீட்டர் பரப்பளவிற்குப் பரவியுள்ளதாகவும், ஜிரோண்டே மற்றும் லேண்ட்ஸ் பகுதிகளில் இருந்து 1,41,000 பேர் வெளியேற்றப்பட்டுள்ளதாகவும் தெரிவித்தார்.

  • சேதங்கள்: ஜிரோண்டேவில் 53 வீடுகள் மற்றும் ஒரு முகாம் எரிந்து நாசமாகின. தீயணைப்புப் பணியில் ஈடுபட்ட 42 வீரர்கள் காயமடைந்துள்ளனர்.

ஸ்பெயின் நிலவரம்: தேசிய அவசரநிலை அறிவிப்பு

  • 60,000 பேர் அகற்றம்: மத்திய ஸ்பெயினின் மாட்ரிட் மற்றும் அவிலா மாகாணங்களில் காட்டுத்தீ பரவியதை அடுத்து 60,000 பேர் தங்கள் வீடுகளை விட்டு வெளியேறியுள்ளனர்.

  • வரலாற்றிலேயே மிக மோசம்: மாட்ரிட் பிராந்தியத்திற்கான மத்திய அரசின் பிரதிநிதி பிரான்சிஸ்கோ மார்ட்டின் தெரிவிக்கையில், மாட்ரிட் வரலாற்றிலேயே இது மிக மோசமான தீ விபத்து என்றும், வெள்ளிக்கிழமை பிற்பகலுக்குள் 30 சதுர கிலோமீட்டர் நிலப்பரப்பு எரிந்து நாசமாகியுள்ளதாகவும் கூறினார்.

  • அவசரநிலை: வெப்ப அலை காரணமாக வெப்பநிலை 39 டிகிரி செல்சியஸைத் தாண்டும் என்று எதிர்பார்க்கப்படுவதால், ஸ்பெயின் அரசு முதன்முறையாக தேசிய அவசரநிலையை அறிவித்துள்ளது.

தப்பிப் பிழைத்த உயிர்கள்!

காவல்துறையினர் வீடு வீடாகச் சென்று மக்களைப் பாதுகாப்பான இடங்களுக்குப் போக அறிவுறுத்தியதால் பெரும் பதற்றம் நிலவியது. இருப்பினும், இரு நாடுகளிலும் இதுவரை உயிரிழப்புகள் எதுவும் பதிவாகவில்லை என்று அதிகாரிகள் உறுதிப்படுத்தியுள்ளனர். 700-க்கும் மேற்பட்ட தீயணைப்பு வீரர்கள் தொடர்ந்து தீயைக் கட்டுப்படுத்தும் பணியில் ஈடுபட்டு வருகின்றனர்.