உலகளவில் முன்னணி குறுஞ்செயலி செயலியான வாட்ஸ்ஆப் (WhatsApp), பயனர்களின் பாதுகாப்பை மேலும் பலப்படுத்தும் நோக்கில், மெசேஜ்களையும் ‘ஒருமுறை மட்டுமே பார்க்க முடியும்’ (View Once Text Messages) என்ற புதிய பிரத்யேக வசதியை அறிமுகப்படுத்த தீவிரமாக சோதித்து வருகிறது.
உலகளவில் 330 கோடிக்கும் (3.3 பில்லியன்) அதிகமான மக்கள் வாட்ஸ்ஆப் செயலியைப் பயன்படுத்தி வருகின்றனர். 180-க்கும் மேற்பட்ட நாடுகளில் கோடிக்கணக்கான மக்களின் அன்றாடத் தேவையாக மாறியுள்ள வாட்ஸ்ஆப் நிறுவனம், கால மாற்றத்திற்கு ஏற்பவும் பயனர்களின் ரசனைக்கு ஏற்பவும் புதுப்புது அப்டேட்டுகளைத் தொடர்ந்து அறிமுகப்படுத்தி வருகிறது.
அந்த வரிசையில், தற்போது பயனர்களின் தனியுரிமையை (Privacy) அடுத்த கட்டத்திற்கு எடுத்துச் செல்லும் புதிய அம்சத்தை வாட்ஸ்ஆப் நிறுவனம் சோதனை செய்து வருகிறது.
செயல்பாடு: இந்த புதிய அப்டேட் மூலம், நாம் ஒருவருக்கு அனுப்பும் மெசேஜை அவர் ஒருமுறை மட்டுமே பார்க்க முடியும்.
ரகசியம் காக்கப்படும்: அவர் அந்த மெசேஜை பார்த்துவிட்டு அரட்டையை (Chat) விட்டு வெளியேறியதும், அந்த செய்தி தானாகவே அழிந்துவிடும்.
பயனர்களின் பாதுகாப்பு மற்றும் ரகசியத் தன்மையை உறுதி செய்ய இந்த அம்சத்தில் கூடுதல் கட்டுப்பாடுகள் விதிக்கப்பட்டுள்ளன:
இந்த முறையில் அனுப்பப்படும் ரகசிய செய்திகளைப் பெறுபவர், அதனை ஸ்கிரீன்ஷாட் (Screenshot) எடுக்கவோ அல்லது நகல் (Copy / Forward) எடுக்கவோ முடியாது.
இதேபோன்ற 'வியூ ஒன்ஸ்' (View Once) வசதி ஏற்கனவே வாட்ஸ்ஆப்பில் பயன்பாட்டில் உள்ளது. ஆனால், அது புகைப்படங்களுக்கும் (Photos) வீடியோக்களுக்கும் (Videos) மட்டுமே தற்போதைக்குக் கிடைக்கிறது.
இந்நிலையில், இந்த வசதியை சாதாரண டெக்ஸ்ட் மெசேஜ்களுக்கும் நீட்டிக்க வாட்ஸ்ஆப் முடிவு செய்துள்ளது. தற்போது பீட்டா வெர்ஷனில் (Beta version) சோதிக்கப்பட்டு வரும் இந்த புதிய வசதி, சோதனைகள் அனைத்தும் முடிவடைந்தவுடன் விரைவில் உலகெங்கிலும் உள்ள அனைத்து பயனர்களின் பயன்பாட்டிற்கும் வரும் என்று எதிர்பார்க்கப்படுகிறது.
