கள்ளக்குறிச்சி மாவட்டம், உளுந்தூர்பேட்டை புறவழிச்சாலையில் உள்ள சென்னை-திருச்சி தேசிய நெடுஞ்சாலைப் பகுதியில் விடுதலைச் சிறுத்தைகள் கட்சியின் (விசிக) ‘தமிழ்த் தேசிய எழுச்சி மாநாடு’ பிரம்மாண்டமாக நடைபெற்றது.
இம்மாநாட்டில் பங்கேற்று உரையாற்றிய விசிக தலைவர் தொல். திருமாவளவன், தமிழக அரசியல் களத்தில் தவெக உடன் விசிக இனி இணைந்தே பயணிக்கும் என்று அதிகாரப்பூர்வமாகத் தெரிவித்துள்ளார்.
மாநாட்டில் திருமாவளவன் ஆற்றிய உரையின் முக்கிய அம்சங்கள்: புதிய அரசியல் பயணம்: "தமிழக அரசியல் களத்தில் தவெக உடன் விசிக இணைந்தே பயணிக்கும். விடுதலைச் சிறுத்தைகள் கட்சியும் ஆளும் கட்சியாக மாறும்.
இத்தனை காலம் ஆளும் கட்சியுடன் நாம் கூட்டணி வைத்தோம்; இனி விசிகவும் ஆளும் அதிகாரத்தைப் பெறும்" என்று குறிப்பிட்டார். தமிழ்த் தேசிய அரசியல்: சாதியையும் சாதியை பாதுகாக்கும் மதவாதத்தையும் எதிர்த்து, மதச்சார்பற்ற மொழிவழி தேசியத்தையும் தமிழ்நாட்டில் தமிழ்த் தேசிய எழுச்சியையும் கட்டியெழுப்ப மாநாடு உறுதி பூண்டுள்ளது.
மாநில சுயஆட்சி & கூட்டாட்சி: மாநிலங்களின் அதிகாரங்களைப் பறிக்கும் மையப்படுத்தும் போக்கைத் தடுத்து, அனைத்து தேசிய இனங்களுக்கும் தன்னாட்சி அதிகாரம் மற்றும் மொழி-பண்பாட்டு உரிமைகளை உறுதிசெய்யும் ஒன்றிய கூட்டாட்சியை உருவாக்க வேண்டும்.
125 தீர்மானங்கள் நிறைவேற்றம்: கல்வி, பொருளாதாரம், கலை, நிர்வாகம் உள்ளிட்ட அனைத்துத் துறைகளிலும் மாநில அதிகாரங்களை விரிவுபடுத்துவது மற்றும் ‘ஒரே தேசம், ஒரே ஆட்சி, ஒரே கட்சி’ எனும் அரசியலை நிராகரிப்பது உள்ளிட்ட 125 முக்கிய தீர்மானங்கள் இம்மாநாட்டில் நிறைவேற்றப்பட்டுள்ளன.
கூட்ட நெரிசலால் சுருக்கப்பட்ட உரை சுமார் 40 ஏக்கர் பரப்பளவில் அமைக்கப்பட்ட மாநாட்டுத் திடலில் லட்சக்கணக்கான தொண்டர்கள் குவிந்ததால் கடும் கூட்ட நெரிசல் ஏற்பட்டது. இதனால் தொண்டர்களின் பாதுகாப்பைக் கருத்தில் கொண்டு, நீண்ட நேரம் பேச விரும்பியும் தனது உரையைச் சுருக்கமாக முடித்துக் கொள்வதாகத் திருமாவளவன் தெரிவித்தார்.
