திருச்சி மாவட்டம் பெட்டவாய்த்தலை அருகே, தமிழக வெற்றி கழகத்தின் (த.வெ.க) அலுவலகம் மர்ம நபர்களால் தீயிட்டு கொளுத்தப்பட்ட சம்பவம் அப்பகுதியில் பெரும் பதற்றத்தை ஏற்படுத்தியுள்ளது. சட்டமன்றத் தேர்தல் வாக்கு எண்ணிக்கை இன்னும் சில தினங்களில் (மே 4) நடைபெறவுள்ள நிலையில், இந்தத் தாக்குதல் அரசியல் வட்டாரத்தில் பரபரப்பை கிளப்பியுள்ளது.
திருச்சி - கரூர் தேசிய நெடுஞ்சாலையில் உள்ள காமநாயக்கன்பாளையம் பகுதியில், தமிழக வெற்றி கழகத்தின் திருச்சி மாநகர மாவட்ட விவசாய அணி அலுவலகம் மற்றும் ஸ்ரீரங்கம் தொகுதி வேட்பாளர் ரமேஷ் அவர்களின் தேர்தல் அலுவலகம் செயல்பட்டு வருகிறது.
இன்று அதிகாலை வேளையில் அங்கு வந்த மர்ம நபர்கள்:
அலுவலகத்தில் வைக்கப்பட்டிருந்த கட்சிப் பதாகைகளை (Flex) கத்தியால் கிழித்து எறிந்துள்ளனர்.
தொடர்ந்து அலுவலகத்திற்கு தீ வைத்துள்ளனர்.
இந்தத் தீ விபத்தில் அலுவலகம் முற்றிலும் சேதமடைந்துள்ளது. இதன் சேத மதிப்பு சுமார் ரூ. 50,000 என கணக்கிடப்பட்டுள்ளது.
இந்த வன்முறை குறித்து மாவட்ட விவசாய அணி செயலாளர் வீரசிவா மற்றும் ஸ்ரீரங்கம் தொகுதி வேட்பாளர் ரமேஷ் ஆகியோர் பெட்டவாய்த்தலை காவல் நிலையத்தில் புகார் அளித்துள்ளனர். குற்றவாளிகளை உடனடியாகக் கண்டறிந்து கைது செய்ய வேண்டும் என அவர்கள் வலியுறுத்தியுள்ளனர்.
தாக்குதல் தொடர்பாக வேட்பாளர் ரமேஷ் அளித்துள்ள புகார் மனுவில் அதிரடியான சில குற்றச்சாட்டுகளை முன்வைத்துள்ளார்:
"எனது தேர்தல் அலுவலகம் திட்டமிட்டு தீயிட்டு அழிக்கப்பட்டுள்ளது. வரும் மே 4-ம் தேதி வாக்கு எண்ணிக்கை நடைபெற உள்ள நிலையில், எனக்கும் எனது கழக நிர்வாகிகளுக்கும் எதிராக வன்முறையை அரங்கேற்ற எதிர்க்கட்சிகள் திட்டமிட்டுள்ளதாக தகவல்கள் கிடைத்துள்ளன
வாக்கு எண்ணிக்கை நேர்மையாகவும், பாதுகாப்பாகவும் நடைபெறுமா என்ற அச்சம் எழுந்துள்ளது, இந்திய தேர்தல் ஆணையம் மற்றும் தமிழக தலைமை தேர்தல் அதிகாரி இதில் உடனடியாகத் தலையிட வேண்டும்,வாக்கு எண்ணும் மையத்தில் த.வெ.க வேட்பாளர் மற்றும் முகவர்களுக்கு கூடுதல் பாதுகாப்பு வழங்க வேண்டும்.