தமிழக டாஸ்மாக் கடைகளில் விற்பனை செய்யப்படும் ‘வீரன் ஸ்பெஷல்’ பிராந்தி உள்ளிட்ட 11 வகை மதுபானங்களுக்கு விதிக்கப்பட்டிருந்த விற்பனைத் தடையை டாஸ்மாக் நிர்வாகம் ஒரே நாளில் வாபஸ் பெற்றுள்ளது.
ஆய்வும் விற்பனைத் தடையும்:
பூந்தமல்லி பிரதான சாலையில் உள்ள தனியார் மதுபான உற்பத்தி நிறுவனத்தில் கடந்த 11-ஆம் தேதி உணவுப் பாதுகாப்பு மற்றும் தர நிர்ணய ஆணைய (FSSAI) அதிகாரிகள் அதிரடி ஆய்வு மேற்கொண்டனர்.
இந்த ஆய்வின் போது, அங்கு உற்பத்தி செய்யப்படும் குறிப்பிட்ட மதுபானங்களில் அனுமதிக்கப்பட்ட அளவை விட அதிகமாகச் செயற்கை சுவையூட்டும் பொருட்கள் சேர்க்கப்பட்டிருந்தது கண்டறியப்பட்டதாகத் தெரிவிக்கப்பட்டது.
இதனைத் தொடர்ந்து, அந்த நிறுவனத்திடம் இருந்து விநியோகிக்கப்படும் 11 வகை மதுபானங்களின் விற்பனையை உடனடியாக நிறுத்துமாறு டாஸ்மாக் நிர்வாகம் உத்தரவிட்டது.
தடை விதிக்கப்பட்ட 11 மதுபான வகைகள்:
விஎஸ்ஓபி எக்ஸைசா கோல்டு பிராந்தி (VSOP Excisa Gold Brandy)
லூயிஸ் வெர்னான்ட் எக்ஸ்ஓ பிளெண்டட் பிரீமியம் பிராந்தி (Louis Vernant XO Blended Premium Brandy)
மெக்டொவெல்ஸ் விஎஸ்ஓபி பிராந்தி (McDowell's VSOP Brandy)
நம்பர் ஒன் மெக்டொவெல்ஸ் பைன் பிராந்தி (No.1 McDowell's Fine Brandy)
மென்ஸ் கிளப் டீலக்ஸ் பிராந்தி (Men's Club Deluxe Brandy)
ஹனி பீ பைன் பிராந்தி (Honey Bee Fine Brandy)
என்ரிகா விஎஸ்ஓபி செலக்ட் பிராந்தி (Enrica VSOP Select Brandy)
என்ரிகா பிளாட்டினம் ரிசர்வ் எக்ஸ்ஓ பிராந்தி (Enrica Platinum Reserve XO Brandy)
என்ரிகா பிரீமியம் பிரெஞ்ச் பிராந்தி (Enrica Premium French Brandy)
வீரன் ஸ்பெஷல் பிராந்தி (Veeran Special Brandy)
என்ரிகா ஓல்டு இண்டி கிளாசிக் டார்க் ரம் (Enrica Old Indy Classic Dark Rum)
ஒரே நாளில் விலக்கப்பட்ட தடை:
இந்நிலையில், உணவுப் பாதுகாப்பு மற்றும் தரக்கட்டுப்பாட்டு அமைப்பு தரப்பில் ஆய்வு முடிவுகளுக்குப் பின் தடையை நீக்கலாம் எனப் பரிந்துரைக்கப்பட்டதாகக் கூறப்படுகிறது.
இதன் அடிப்படையில், தடை உத்தரவு பிறப்பிக்கப்பட்ட மறுநாளே 11 வகை மதுபானங்கள் மீதான தடையை நீக்கி, அவற்றை வழக்கம்போல் கடைகளில் விற்பனை செய்ய டாஸ்மாக் நிர்வாகம் அனுமதி அளித்துள்ளது. இந்த விரைவு நடவடிக்கை மதுப்பிரியர்கள் மற்றும் வட்டாரங்களில் ஆச்சரியத்தை ஏற்படுத்தியுள்ளது.
