தமிழக பகுதிகளின் மேல் நிலவும் வளிமண்டல மேலடுக்கு சுழற்சி மற்றும் காற்றழுத்த தாழ்வு பாதை காரணமாக, கோவை உள்ளிட்ட 3 மாவட்டங்களில் நாளை (அக்டோபர் 1) கனமழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.
இது தொடர்பாக வானிலை ஆய்வு மையம் வெளியிட்ட செய்திக்குறிப்பில் தெரிவிக்கப்பட்டுள்ளதாவது:
வானிலை நிலவரம்
வட கடலோர தமிழக பகுதிகளின் மேல் சுமார் 1.5 கி.மீ. உயரம் வரை ஒரு வளிமண்டல சுழற்சி நிலவுகிறது.
தெற்கு உள் கர்நாடகம் முதல் மன்னார் வளைகுடா வரை, தமிழக பகுதிகள் வழியாக சுமார் 0.9 கி.மீ. உயரத்தில் காற்றழுத்த தாழ்வு பாதை (Trough) நிலவுகிறது.
மழை முன்னறிவிப்பு
இன்று (செப்டம்பர் 30):
கனமழை எச்சரிக்கை: நீலகிரி, ஈரோடு, திருப்பூர், சேலம், தருமபுரி, கிருஷ்ணகிரி, திருவண்ணாமலை, கடலூர், நாமக்கல், திருச்சி, மயிலாடுதுறை, நாகப்பட்டினம், திருவாரூர், தஞ்சாவூர், புதுக்கோட்டை ஆகிய 15 மாவட்டங்களில் ஓரிரு இடங்களிலும், காரைக்கால் பகுதியிலும் இடி-மின்னல் மற்றும் பலத்த காற்றுடன் (மணிக்கு 40 - 50 கி.மீ. வேகம்) கூடிய கனமழை பெய்யக்கூடும்.
மிதமான மழை: மேற்குத் தொடர்ச்சி மலை மாவட்டங்கள், திருப்பத்தூர், வேலூர், ராணிப்பேட்டை, அரியலூர், பெரம்பலூர், கரூர், விழுப்புரம், மதுரை, சிவகங்கை, ராமநாதபுரம், தூத்துக்குடி மற்றும் புதுச்சேரியில் ஒருசில இடங்களில் லேசானது முதல் மிதமான மழை பெய்யக்கூடும்.
நாளை (அக்டோபர் 1):
கனமழை எச்சரிக்கை: நீலகிரி, கோயம்புத்தூர் மற்றும் ஈரோடு ஆகிய 3 மாவட்டங்களில் ஓரிரு இடங்களில் இடி-மின்னல் மற்றும் பலத்த காற்றுடன் (மணிக்கு 40 - 50 கி.மீ. வேகம்) கூடிய கனமழை பெய்ய வாய்ப்புள்ளது.
மிதமான மழை: திருச்சி, நாமக்கல், தேனி, தென்காசி, திருப்பூர், திண்டுக்கல், மதுரை, விருதுநகர், திருநெல்வேலி, கன்னியாகுமரி மாவட்டங்களில் பலத்த காற்றுடன் கூடிய மிதமான மழை பெய்யக்கூடும்.
சென்னை மற்றும் புறநகர் வானிலை
இன்று (செப். 30): வானம் ஓரளவு மேகமூட்டத்துடன் காணப்படும். மாலை அல்லது இரவு நேரங்களில் நகரின் ஒருசில பகுதிகளில் இடி-மின்னலுடன் கூடிய லேசானது முதல் மிதமான மழை பெய்ய வாய்ப்புள்ளது.
நாளை (அக். 1): மாலை/இரவு நேரங்களில் நகரின் ஒருசில பகுதிகளில் லேசான மழை பெய்யக்கூடும்.
வெப்பநிலை: அதிகபட்ச வெப்பநிலை 36–37°C ஆகவும், குறைந்தபட்ச வெப்பநிலை 27–28°C ஆகவும் நிலவக்கூடும்.
