"வேலைக்குச் செல்லாத குடும்பத் தலைவிகள் மேற்கொள்ளும் பணி, நாட்டைக் கட்டமைக்கும் உன்னதமான பணி; அவர்களுக்கு மாத ஊதியம் வழங்கப்படாவிட்டாலும், அவர்களது உழைப்பின் மதிப்பு மாதத்திற்கு குறைந்தபட்சம் ₹30,000 ஆகும்" என்று உச்ச நீதிமன்றம் வரலாற்றுச் சிறப்புமிக்க தீர்ப்பை வழங்கியுள்ளது.

சாலை விபத்துகளில் உயிரிழக்கும் இல்லத்தரசிகளுக்கான இழப்பீட்டைத் தீர்மானிக்கும் வழக்கில் உச்ச நீதிமன்றம் இந்த அதிரடி உத்தரவைப் பிறப்பித்துள்ளது.

திறன்மிகு தொழிலாளர்களுடன் ஒப்பிடக் கூடாது

நாடு முழுவதும் வாகன விபத்து வழக்குகளில் வழங்கப்படும் இழப்பீட்டுத் தொகையை மாற்றியமைக்கக் கோரிய வழக்குகளை உச்ச நீதிமன்ற நீதிபதிகள் சஞ்சய் கரோல் மற்றும் என். கோடீஸ்வர் சிங் ஆகியோர் அடங்கிய அமர்வு விசாரித்தது.

அப்போது, விபத்தில் உயிரிழக்கும் இல்லத்தரசிகளின் தோராயமான வருவாயை, சாதாரண திறன்மிக்க தொழிலாளர்களின் (Skilled Labourers) ஊதியத்துடன் ஒப்பிட்டு கணக்கிடும் நீண்டகால நடைமுறையை நீதிபதிகள் திட்டவட்டமாக நிராகரித்தனர். இதுபோன்ற அணுகுமுறை, வீட்டுப் பராமரிப்புப் பணிகளின் உண்மையான பொருளாதார மற்றும் சமூக மதிப்பைப் பிரதிபலிக்கத் தவறிவிடுகிறது என்று நீதிபதிகள் சுட்டிக்காட்டினர்.

உச்ச நீதிமன்றத்தின் புதிய வழிகாட்டு நெறிமுறை

நீதிபதிகள் தங்கள் தீர்ப்பில் குறிப்பிட்டதாவது:

"இல்லத்தரசிகள் 'தேசத்தை உருவாக்குபவர்கள்' (Nation Builders) என அங்கீகரிக்கப்படத் தகுதியானவர்கள். நாங்கள் ஒரு புதிய வழிகாட்டு நெறிமுறையை உருவாக்கியுள்ளோம். அதன்படி, பிரணாய் சேத்தி வழக்கின் கீழ் கிடைக்கக்கூடிய இதர இழப்பீடுகளுடன் கூடுதலாக, விபத்தில் உயிரிழக்கும் இல்லத்தரசிகளின் வீட்டுப் பராமரிப்புப் பணிகளுக்கான இழப்பீட்டு மதிப்பை மாதத்திற்கு குறைந்தபட்சம் ₹30,000 என நிர்ணயித்துள்ளோம்."

20 ஆண்டு கால தாமதத்திற்கு நீதிமன்றம் கவலை

பஞ்சாப் மாநிலத்தைச் சேர்ந்த ரேஷ்மா என்ற குடும்பத் தலைவி, கடந்த 2001ஆம் ஆண்டு நவம்பர் மாதம் சாலை விபத்தில் மரணமடைந்தார். விபத்து நடந்து 20 ஆண்டுகளுக்குப் பிறகே இந்த வழக்கு நீதிமன்றங்களில் முறைப்படி விசாரணைக்கு வந்துள்ளது. இது குறித்துப் பலத்த கவலை தெரிவித்த உச்ச நீதிமன்றம், "சாலை விபத்து வழக்குகளில் ஓராண்டுக்குள் இழப்பீடு குறித்து முடிவெடுத்து அறிவிக்க வேண்டும்; அனைத்து நீதிமன்றங்களும் இதில் கண்காணிப்புடன் இருக்க வேண்டும்" என்று அறிவுறுத்தியுள்ளது.

உழைப்புக்குக் குறைவில்லாத மதிப்பு

குடும்பத் தலைவிகளுக்கு முறைப்படி ஊதியம் வழங்கப்படுவதில்லை என்பதற்காக அவர்களது பணியைக் குறைத்து மதிப்பிடக்கூடாது என்றும், அவர்கள் குடும்பத்திற்காகச் செய்யும் வேலைகளுக்கு மதிப்பிட முடியாத அளவுக்குப் பொருளாதார மற்றும் சமூக மதிப்பு உள்ளது என்றும் உச்ச நீதிமன்றம் இந்தத் தீர்ப்பின் மூலம் மீண்டும் நிலைநிறுத்தியுள்ளது.