மத்திய உள்துறை அமைச்சர் அமித் ஷா தலைமையில் தென் மண்டலக் குழுக் கூட்டம் சென்னை அருகே உள்ள கோவளத்தில் இன்று நடைபெற்றது. இந்த முக்கிய மாநாட்டில் தமிழக முதல்வர் ஜோசப் விஜய் பங்கேற்று, மாநிலத்தின் உரிமைகள் மற்றும் தென்மாநிலங்களின் கூட்டாட்சித் தத்துவம் சார்ந்த பல்வேறு கோரிக்கைகளை வலியுறுத்திப் பேசினார்.
கோவளத்தில் உள்ள பிரபல நட்சத்திர ஹோட்டலில் நடைபெற்ற இந்த ஆலோசனைக் கூட்டத்தில் ஆந்திர முதல்வர் என். சந்திரபாபு நாயுடு, கர்நாடக துணை முதல்வர் டி.கே. சிவகுமார், கேரள எதிர்க்கட்சித் தலைவர் வி.டி. சதீசன் மற்றும் தெலங்கானா மாநிலத்தின் பிரதிநிதிகள் உள்ளிட்ட பல முக்கியத் தலைவர்கள் கலந்து கொண்டனர்.
இக்கூட்டத்தில் தமிழக முதல்வர் விஜய் உரையாற்றுகையில் முன்வைத்த முக்கிய அம்சங்கள்
நிதி சுயாட்சி: தென்மாநிலங்களுக்கு போதிய நிதி செலவீன சுயாட்சி அதிகாரம் வழங்கப்பட வேண்டும்.
தொகுதி மறுவரையறை: நாடாளுமன்றத் தொகுதி மறுவரையறை நடவடிக்கைகளின் போது தென்மாநிலங்களின் பிரதிநிதித்துவம் எந்த வகையிலும் குறையக் கூடாது.
நீட் தேர்வு விலக்கு: தமிழகத்திற்கு நீட் தேர்வில் இருந்து முழு விலக்கு அளிக்கப்பட வேண்டும். மாநில ஒதுக்கீட்டு மருத்துவ இடங்களுக்கு 12-ஆம் வகுப்பு மதிப்பெண்கள் அடிப்படையிலேயே சேர்க்கை நடத்தப்பட வேண்டும்.
ஒசூர் - பெங்களூரு மெட்ரோ நீட்டிப்பு: பெங்களூரு மெட்ரோ ரயில் சேவையை ஒசூர் வரை நீட்டிக்க வேண்டும். இதன் மூலம் தமிழகம் மற்றும் கர்நாடகம் ஆகிய இரு மாநில மக்களும் பெருமளவில் பயனடைவர்.
நதிநீர் விவகாரங்கள்: மாநிலங்களுக்கு இடையிலான நதிநீர் பிரச்சினைகளில் உச்ச நீதிமன்றத்தின் தீர்ப்புகளை முறையாகப் பின்பற்ற வேண்டும். மேலும், காவிரி மேலாண்மை ஆணையத்தின் உத்தரவுகளை அனைத்து மாநிலங்களும் அமல்படுத்துவதை மத்திய அரசு உறுதி செய்ய வேண்டும்.
முல்லைப் பெரியாறு அணை: முல்லைப் பெரியாறு அணையின் நீர்மட்டத்தை 152 அடியாக உயர்த்த நடவடிக்கை எடுக்கப்பட வேண்டும்.
போதைப்பொருள் தடுப்பு & ஆன்லைன் மருந்து விற்பனை: ஆன்லைன் மூலமான மருந்து விற்பனையைக் கட்டுப்படுத்த முறையான ஒழுங்குமுறைகள் தேவை. மேலும், போதைப் பொருட்கள் கடத்தலைத் தடுக்க தென்மாநிலங்களுக்கு இடையே ஒருங்கிணைந்த கூட்டமைப்பு உருவாக்கப்பட வேண்டும்.
தென்மாநிலங்களின் உரிமைகளை நிலைநாட்டும் வகையில் தமிழக முதல்வர் பேசிய இந்த உரையாடல், மாநாட்டில் பெரும் கவனத்தைப் பெற்றுள்ளது.
