உலகெங்கும் சமூக வலைதளப் பயன்பாடு அதிகரித்து வரும் நிலையில், மறுபுறம் இணையவழி மோசடிகளும் உச்சத்தைத் தொட்டுள்ளன. 2025-ஆம் ஆண்டில் மட்டும் சமூக வலைதளங்கள் வாயிலாக சுமார் 2.1 பில்லியன் டாலர்கள் (இந்திய மதிப்பில் தோராயமாக ரூ. 1.89 லட்சம் கோடி) மோசடி செய்யப்பட்டுள்ளதாகக் கூட்டாட்சி வணிக ஆணையம் (FTC) அதிர வைக்கும் தகவலை வெளியிட்டுள்ளது.
மோசடிகளின் கூடாரமாகும் சமூக வலைதளங்கள்
இணையவழி மோசடிகள் முன்னெப்போதும் இல்லாத வகையில் தற்போது விஸ்வரூபம் எடுத்துள்ளன. அழைப்புகள், குறுஞ்செய்திகள் மற்றும் மின்னஞ்சல்கள் வாயிலாகத் தொடங்கப்படும் இந்த வலைகளில் சிக்கி, உலக அளவில் 30% மக்கள் தங்களது பணத்தை இழந்துள்ளதாகத் தரவுகள் தெரிவிக்கின்றன.
குறிப்பாக, பின்வரும் செயலிகள் இந்த மோசடி பட்டியலில் முன்னிலை வகிக்கின்றன:
ஃபேஸ்புக் (Facebook)
இன்ஸ்டாகிராம் (Instagram)
வாட்ஸ்ஆப் (WhatsApp)
இதில் அதிகப்படியான மக்கள் ஃபேஸ்புக் மூலமாகவே ஏமாற்றப்படுகிறார்கள் என்பது குறிப்பிடத்தக்கது.
மோசடி நடப்பது எப்படி?
சமூக வலைதளங்களில் நேரடியான வழிகளில் மட்டுமன்றி, மிகவும் நுணுக்கமான முறைகளிலும் மோசடிகள் அரங்கேறுகின்றன:
போலி விளம்பரங்கள்: கவர்ச்சிகரமான விளம்பரங்களைக் காட்டி மக்களை ஈர்ப்பது.
மின்னஞ்சல் மற்றும் லிங்க்கள்: சந்தேகத்திற்குரிய லிங்க்களைக் கிளிக் செய்யத் தூண்டுவது.
கணக்கு முடக்கம்: நமக்குத் தெரிந்தவர்களின் சமூக வலைதளக் கணக்குகளை முடக்கி (Hacking), அவர்கள் பெயரிலேயே பண உதவி கேட்பது.
மக்கள் ஏமாறும் 3 முக்கிய மோசடி வகைகள்
மோசடி செய்பவர்கள் பயன்படுத்தும் முதன்மையான ஆயுதங்களாகப் பின்வருபவை அடையாளம் காணப்பட்டுள்ளன:
ஷாப்பிங் மோசடி-அசலான இணையதளத்தைப் போலவே போலித் தளத்தை உருவாக்கி, குறைந்த விலையில் பொருட்களை விளம்பரப்படுத்துவது. பணத்தைச் செலுத்திய பின் தரம் குறைந்த பொருளோ அல்லது தேவையற்ற பொருளோ அனுப்பப்படும்.
முதலீட்டு மோசடி-எளிய முறையில் லாபம் ஈட்டலாம் என ஆசை காட்டுவது. 2025-ல் மட்டும் இதன் மூலம் 1.1 பில்லியன் டாலர் கொள்ளையடிக்கப்பட்டுள்ளது. போலி வெற்றிக் கதைகளைக் கூறி மக்களைக் குழுக்களில் இணைத்து ஏமாற்றுகின்றனர்.
போலி காதல் (Romance Scams)சமூக வலைதளங்களில் போலியான பெயர் மற்றும் புகைப்படங்களுடன் அறிமுகமாகி, காதலிப்பதாக நடித்துப் பணத்தைப் பறிப்பது.
சமூக வலைதளங்களில் முன்பின் தெரியாத நபர்களிடம் பணப் பரிமாற்றம் செய்வதையும், கவர்ச்சிகரமான முதலீட்டுத் திட்டங்களை நம்புவதையும் மக்கள் தவிர்க்க வேண்டும் எனப் பாதுகாப்பு நிபுணர்கள் அறிவுறுத்துகின்றனர்.