சௌதி அரேபியா, துருக்கி மற்றும் பாகிஸ்தான் ஆகிய நாடுகள் மேற்கொண்டுள்ள முத்தரப்பு பாதுகாப்பு ஒப்பந்தம் சௌதிக்கு எந்தவித பாதுகாப்பையும் தராது என்று ஈரான் காட்டமாகத் தெரிவித்துள்ளது.
சௌதி அரேபியா பட்டத்து இளவரசர் முகமது பின் சல்மான், பாகிஸ்தான் பிரதமர் ஷாபாஸ் ஷரீஃப் மற்றும் துருக்கி அதிபர் ரெசப் தயிப் எர்டோகன் ஆகியோர் வரலாற்றுச் சிறப்புமிக்க முத்தரப்பு பாதுகாப்பு ஒப்பந்தத்தில் கையெழுத்திட்டனர்.
ஒப்பந்தத்தின் முக்கிய அம்சங்கள்:
மூன்று நாடுகளில் ஏதேனும் ஒரு நாட்டின் மீது தாக்குதல் நடத்தப்பட்டால், அது மற்ற இரு நாடுகளின் மீதான தாக்குதலாகக் கருதப்படும்.
பரஸ்பர பாதுகாப்பு மற்றும் ராணுவப் பலத்தை மேம்படுத்துவதே இக்கூட்டணியின் முதன்மை நோக்கமாகும்.
ஈரானின் கடும் எதிர்ப்பு:
இந்த ஒப்பந்தம் குறித்துப் பேசிய ஈரானிய நாடாளுமன்ற உறுப்பினர் இப்ராஹிம் ரெசாயி, சௌதி அரேபியாவின் இந்த நடவடிக்கையைக் கடுமையாக விமர்சித்துள்ளார்.
இது குறித்து அவர் தனது எக்ஸ் (X) தளப் பக்கத்தில் பதிவிட்டுள்ளதாவது:
"அமெரிக்காவுக்குப் பல ஆண்டுகளாக ஒருதலைப்பட்ச ஆதரவு அளித்தும் சௌதிக்கு உரிய பாதுகாப்பு கிடைக்கவில்லை. அதேபோல, துருக்கி மற்றும் பாகிஸ்தானுடனான இந்த வெறும் காகித ஒப்பந்தமும் அவர்களுக்குப் பாதுகாப்பைத் தராது என்பதை சௌதி உணர வேண்டும். பிற நாடுகளிடம் பாதுகாப்பிற்காகக் கெஞ்ச வேண்டிய நிலை ஏற்படாத வகையில் சௌதி அரேபியா தனது வெளியுறவுக் கொள்கைகளைச் சீரமைத்துக் கொள்ள வேண்டும்."
சௌதி அரேபியா, துருக்கி மற்றும் பாகிஸ்தான் ஆகிய மூன்று நாடுகளுடனும் ஈரான் நிலம் மற்றும் கடல் வழியே எல்லைகளைப் பகிர்ந்து வரும் சூழலில், ஈரானின் இந்த அறிக்கை சர்வதேச அரசியலில் பெரும் பரபரப்பை ஏற்படுத்தியுள்ளது.
