மக்களவை எதிர்க்கட்சித் தலைவர் ராகுல் காந்தி தில்லியில் வலுக்கட்டாயமாகக் கைது செய்யப்பட்டதற்கும், தலைநகரில் ஜனநாயகம் நசுக்கப்படுவதற்கும் தமிழக வெற்றிக் கழகம் (தவெக) கடும் கண்டனம் தெரிவித்துள்ளதுடன், நீட் தேர்வை ஒன்றிய அரசு உடனடியாக ரத்து செய்ய வேண்டும் என்றும் வலியுறுத்தியுள்ளது.
மருத்துவப் படிப்புகளுக்கான நீட் தேர்வு முறைகேடுகளைக் கண்டித்தும், மத்திய கல்வித் துறை அமைச்சர் தர்மேந்திர பிரதான் பதவி விலகக் கோரியும் ஜந்தர் மந்தர் திடலில் இருந்து நாடாளுமன்றம் நோக்கி ஜூலை 20-ஆம் தேதி பேரணி நடைபெற்றது.
நாடாளுமன்ற சாலையில் நுழைய முயன்ற போராட்டக்காரர்கள் மீது காவல் துறையினர் கண்ணீர் புகைக் குண்டுகளை வீசியும், தடியடி நடத்தியும் கலைத்தனர். இதில் மாணவர்கள், பெண்கள் உட்பட பலர் படுகாயமடைந்து மருத்துவமனையில் சிகிச்சை பெற்று வரும் நிலையில், தொடர்ந்து அடுத்த நாளும் போராட்டம் நீடித்தது.
ராகுல் காந்தி உள்ளிட்ட தலைவர்கள் குண்டுக்கட்டாகக் கைது:
இந்தப் போராட்டத்தில் காங்கிரஸ் தலைவர் மல்லிகார்ஜுன கார்கே, மக்களவை எதிர்க்கட்சித் தலைவர் ராகுல் காந்தி, பொதுச் செயலர்கள் பிரியங்கா காந்தி, கே.சி. வேணுகோபால், சமாஜ்வாதி கட்சித் தலைவர் அகிலேஷ் யாதவ், கர்நாடக துணை முதல்வர் டி.கே. சிவகுமார் உள்ளிட்ட முக்கியத் தலைவர்கள் பங்கேற்றனர்.
பிரதமர் இல்லத்தை முற்றுகையிடும் வகையில் பேரணியாகச் செல்ல முயன்ற ராகுல் காந்தி, பிரியங்கா காந்தி, அகிலேஷ் யாதவ் உள்ளிட்டோரை காவல் துறையினர் வலுக்கட்டாயமாக குண்டுக்கட்டாகத் தூக்கிச் சென்று வாகனங்களில் ஏற்றி கைது செய்தனர். காவல் துறையினரின் இந்த நடவடிக்கைக்கு நாடு முழுவதும் எதிர்க்கட்சியினர் கடும் எதிர்ப்பைப் பதிவு செய்து வருகின்றனர்.
தமிழக வெற்றிக் கழகத்தின் எக்ஸ் (X) தளப் பதிவு:
இச்சம்பவம் குறித்து தமிழக வெற்றிக் கழகம் தனது அதிகாரப்பூர்வ எக்ஸ் பக்கத்தில் வெளியிட்ட அறிக்கையில் கூறியிருப்பதாவது:
"தலைநகரில் ஜனநாயகம் நசுக்கப்படுவது வன்மையாகக் கண்டிக்கத்தக்கது! டெல்லியில் நடைபெற்ற இளைஞர்களின் அறவழிப் போராட்டத்துக்கு ஆதரவாகக் களமிறங்கிய மக்களவை எதிர்க்கட்சித் தலைவர் ராகுல் காந்தி அவர்கள் டெல்லி காவல்துறையால் இழுத்துச்செல்லப்பட்டும் குண்டுக்கட்டாகத் தூக்கிச் சென்றும் கைது செய்யப்பட்டது ஜனநாயக உரிமைகள் மீதான அப்பட்டமானத் தாக்குதலாகும். இது வன்மையாகக் கண்டிக்கத்தக்கது.
நீட் தேர்வு நடைமுறைப்படுத்தப்பட்டது முதலே அதன் மீதான நம்பகத்தன்மை குறைவது மட்டுமல்லாமல், மாணவர்கள் மன உளைச்சலுக்கு உள்ளாகி தங்களின் எதிர்காலக் கனவு மிகப்பெரிய கேள்விக்குறியாவதும் தொடர்கிறது. நீட் தேர்வால் ஒவ்வொரு ஆண்டும் மாணவர்கள் பாதிப்பிற்குள்ளாவது நின்றபாடில்லை. எனவே, ஒன்றிய அரசு நீட் தேர்வை முழுவதுமாக ரத்து செய்ய வேண்டும் என்று வலியுறுத்துகிறோம்."
இவ்வாறு தவெக தனது பதிவில் குறிப்பிட்டுள்ளது.
