உலக அளவில் பருவநிலை மாற்றம் காரணமாக அதிகரித்து வரும் வெப்ப அலையின் தாக்கம் குறித்து ஆக்ஸ்ஃபோர்ட் பல்கலைக்கழகம் சமீபத்தில் விரிவான ஆய்வு ஒன்றை நடத்தியது. 'நிலையான நகரங்கள் மற்றும் சமூகங்கள்' (Sustainable Cities and Societies) என்ற சர்வதேச ஆய்விதழில் வெளியிடப்பட்டுள்ள இந்த ஆய்வு முடிவுகள், ஒட்டுமொத்த மனிதகுலத்திற்கும் ஒரு கடுமையான எச்சரிக்கையாக அமைந்துள்ளது.
உலகளவில் மக்கள் எதிர்கொள்ளும் வெப்ப அபாயங்களை மதிப்பிடுவதற்காக, 205 முக்கிய நகரங்களில் இந்த ஆய்வு மேற்கொள்ளப்பட்டது. அதில், உலகின் அதிக வெப்ப பாதிப்புக்குள்ளாகும் 50 நகரங்களின் பட்டியலில் 14 இந்திய நகரங்கள் இடம்பெற்று பெரும் அதிர்ச்சியை ஏற்படுத்தியுள்ளன.
இந்த பட்டியலில் இந்தியாவிலிருந்து மகாராஷ்டிராவின் நாக்பூர் மற்றும் தமிழகத்தின் வரலாற்றுச் சிறப்புமிக்க ஆன்மீக நகரமான மதுரை ஆகிய இரு நகரங்களும் உலக அளவில் முதல் 10 இடங்களுக்குள் இடம்பிடித்துள்ளன. தென் இந்தியாவின் முக்கிய நகரங்களில் ஒன்றான மதுரையில் நிலவி வரும் கடுமையான கோடை வெப்பமும், அதனைச் சமாளிப்பதற்கான போதிய உள்கட்டமைப்பு வசதிகள் குறைவாக இருப்பதும் இந்த தீவிர அபாயத்திற்குக் காரணமாகக் கூறப்பட்டுள்ளது.
இந்தியாவில் நாக்பூர், மதுரை தவிர மேலும் 12 முக்கிய நகரங்கள் இந்த 50 நகரங்களின் பட்டியலில் இடம்பெற்றுள்ளன. அவை:
போபால்
கான்பூர்
புனே
பாட்னா
ஹைதராபாத்
பெங்களூரு
கொல்கத்தா
ஜெய்ப்பூர் (முக்கிய சுற்றுலாத் தலம்)
லக்னௌ
சென்னை
சர்வதேச அளவில் எகிப்தின் கெய்ரோ, தாய்லாந்தின் பாங்காக், வியட்நாமின் ஹனோய் போன்ற உலகப் புகழ்பெற்ற பெருநகரங்களும் இப்பட்டியலில் அதிக வெப்ப அபாயம் கொண்ட நகரங்களாக அடையாளம் காணப்பட்டுள்ளன.
ஆக்ஸ்ஃபோர்ட் பல்கலைக்கழக ஆய்வின்படி, ஈராக் நாட்டின் அல் பஸ்ரா (Al Basrah) நகர் உலகிலேயே மிக மோசமான, அதிக வெப்ப அபாயத்தைக் கொண்ட நாடாக (நகரமாக) முதலிடத்தில் குறிப்பிடப்பட்டுள்ளது.
மேலும், அதிக வெப்ப அபாயத்தைக் கொண்ட 95 சதவீதத்திற்கும் அதிகமான நகரங்கள் தெற்கு ஆசியா, தென்கிழக்கு ஆசியா மற்றும் ஆப்பிரிக்கா ஆகிய பகுதிகளிலேயே அமைந்துள்ளன. குறிப்பாக இந்தியா, பாகிஸ்தான், நைஜீரியா மற்றும் கானா போன்ற நாடுகளில் உள்ள நகரங்களே இந்த பட்டியலில் ஆதிக்கம் செலுத்துகின்றன.
ஆசியா மற்றும் ஆப்பிரிக்கா முழுவதுமுள்ள பல முக்கிய நகரங்களில் கடும் வெப்ப பாதிப்பு அதிகமாக இருக்கும் அதே வேளையில், அந்த வெப்ப அலையைத் தாங்கும் அல்லது சமாளிக்கும் திறன் (Cooling Infrastructure) அங்கு வாழும் மக்களிடம் மிகக் குறைவாகக் காணப்படுகிறது.
"அதிகரிக்கும் வெப்பமும், அதனை எதிர்கொள்ளும் திறன் குறைவாக இருப்பதும் ஒன்றிணையும் போது, அது வெப்ப அபாயத்தை இரட்டிப்பாக்குகிறது. இது சில சமயங்களில் சாதாரண மனிதர்களின் உயிருக்கே ஆபத்தான விளைவுகளை ஏற்படுத்துகிறது" என இந்த ஆய்வறிக்கையில் ஆராய்ச்சியாளர்கள் கவலை தெரிவித்துள்ளனர்.
நகர்ப்புறங்களில் மரங்களை நடுதல், நீர்நிலைகளைப் பாதுகாத்தல் மற்றும் பசுமை உள்கட்டமைப்புகளை உருவாக்குவதன் மூலம் மட்டுமே எதிர்காலத்தில் வரவிருக்கும் இந்த பேரழிவிலிருந்து நகரங்களைக் காப்பாற்ற முடியும் என சுற்றுச்சூழல் ஆர்வலர்கள் எச்சரிக்கின்றனர்.
