மார்க்சிஸ்ட் கம்யூனிஸ்ட் கட்சி எம்.பி. ஜான் பிரிட்டாஸ் மாநிலங்களவையில் எழுப்பிய குற்றச்சாட்டுகளுக்கு பதிலளித்த மத்திய நிதியமைச்சர் நிர்மலா சீதாராமன், நாட்டில் உள்ள கம்யூனிஸ்டுகள் முழு கோழைகள் என்று மிகக் காரசாரமாக விமர்சித்துள்ளார்.
வருமானவரி திருத்த மசோதா 2026-ஐ நிராகரிக்கக் கோரி தீர்மானம் கொண்டு வந்த கம்யூனிஸ்ட் எம்.பி. ஜான் பிரிட்டாஸ், இந்தியாவில் யுபிஐ (UPI) பணப் பரிவர்த்தனைகளுக்கு கட்டணம் வசூலிக்க அரசு முடிவு செய்திருப்பதாக குற்றஞ்சாட்டினார். அமெரிக்காவின் அழுத்தம் காரணமாகவே பிரேசில் நாட்டைப் போல இந்தியாவிலும் இந்த நடவடிக்கை எடுக்கப்படுவதாகக் குறிப்பிட்ட அவர், இந்தியாவின் டிஜிட்டல் பரிவர்த்தனை ஒரு இலவச பொதுச்சேவையாகவே உருவாக்கப்பட்டதாகப் பேசினார்.
இதற்கு நிதியமைச்சர் பதிலளிக்கத் தொடங்கியபோது, அவைக்குள் கூச்சலிட்ட ஜான் பிரிட்டாஸ் வெளிநடப்பு செய்தார்.
இதனைத் தொடர்ந்து நிதியமைச்சர் நிர்மலா சீதாராமன் அவையில் பேசியதாவது:
ஆதாரமற்ற அவதூறுகள்: “ஆதாரங்கள் எதுவுமின்றி அனைவரின் மீதும் அவதூறுகளை அள்ளி வீசுவது கம்யூனிஸ்டுகளின் வழக்கமான பாணி. எதையாவது பேசிவிட்டு அது தனது உரிமை என்பார்கள்.”
விவாதத்தை எதிர்கொள்ள பயம்: “துல்லியமான புள்ளிவிவரங்களுடன் பதில் அளித்தால், அதை ஏற்றுக்கொள்ள அவர்களுக்குத் தைரியம் இல்லை. உண்மையை எதிர்கொள்ள முடியாமல் ஓடிவிடுகிறார்கள்.”
முழு கோழைகள்: “நாட்டில் உள்ள கம்யூனிஸ்டுகள் முழு கோழைகள் என்பதை இந்த உறுப்பினர் மீண்டும் நிரூபித்துள்ளார். உண்மையை எதிர்கொள்ளாமல் காலம் தாழ்த்துவதற்காக அவையில் கூச்சலிடுகிறார்கள்.”
யுபிஐ பணப் பரிவர்த்தனைகளுக்கு கட்டணம் வசூலிக்கப்படுவதாக தவறான தகவல்களைப் பரப்பிவிட்டு, பதிலைக் கேட்காமல் வெளிநடப்பு செய்ததன் மூலம் எதிர்க்கட்சிகள் பொறுப்பற்ற முறையில் செயல்படுவதாக நிதியமைச்சர் சாடினார்.
