தமிழகத்தில் போதிய பராமரிப்பின்றி குண்டும் குழியுமாக இருக்கும் சாலைகளைச் சீரமைக்க ரூ.250 கோடி நிதி ஒதுக்கீடு செய்யப்பட்டுள்ளதாக பட்ஜெட்டில் அறிவிக்கப்பட்டுள்ளது. மேலும், சாலைகளில் உள்ள குறைபாடுகளைப் பொதுமக்கள் 'நம்ம சாலை' செயலி மூலம் நேரடியாகப் புகைப்படம் எடுத்துத் தெரிவிக்கலாம் என்றும் அறிவிக்கப்பட்டுள்ளது.
உலகத்தரம் வாய்ந்த, பாதுகாப்பான சாலை உள்கட்டமைப்பை வழங்குவதே அரசின் முக்கிய நோக்கம் என பட்ஜெட்டில் குறிப்பிடப்பட்டுள்ளது.
ஒருங்கிணைந்த சாலை மேம்பாட்டிற்கு ரூ.9,300 கோடி
மாநிலத்தின் சாலை உள்கட்டமைப்பை மேம்படுத்தும் வகையில் 'ஒருங்கிணைந்த சாலை உட்கட்டமைப்பு மேம்பாட்டுத் திட்டத்திற்கு' ரூ.9,300 கோடி ஒதுக்கீடு செய்யப்பட்டுள்ளது. இத்திட்டத்தின் கீழ்:
மாநில நெடுஞ்சாலைகள் 4 வழிச்சாலைகளாக மாற்றப்படும்.
புதிய புறவழிச்சாலைகள் மற்றும் பாலங்கள் அமைக்கப்படும்.
ஊராட்சி மற்றும் கிராமப்புறச் சாலைகள் தரம் உயர்த்தப்படும்.
சாலைப் பாதுகாப்பு மற்றும் ஓடுதள மேம்பாட்டுப் பணிகள் மேற்கொள்ளப்படும்.
செயற்கை நுண்ணறிவுடன் 'பாதுகாப்பான சாலைகள் இயக்கம்'
சாலைப் பாதுகாப்பை உறுதி செய்ய புதிதாக 'பாதுகாப்பான சாலைகள் இயக்கம்' தொடங்கப்படவுள்ளது. இதன் மூலம்:
செயற்கை நுண்ணறிவு (AI) தொழில்நுட்பத்தைப் பயன்படுத்தி வாகனங்களின் வேகக் கட்டுப்பாடு மற்றும் போக்குவரத்து விதிமீறல்கள் கண்காணிக்கப்படும்.
சாலை ரோந்துப் பிரிவுகள் மற்றும் தீவிர காயங்களுக்கான அவசர சிகிச்சை மையங்கள் வலுப்படுத்தப்படும்.
‘செயல்திறன் அடிப்படையிலான’ பராமரிப்பு
பொதுமக்கள் சந்திக்கும் பயணச் சிரமங்களைக் குறைக்கும் வகையில், பழுதடைந்த சாலைகளைச் சீரமைக்க ரூ.250 கோடி நிதி ஒதுக்கப்பட்டுள்ளது. இந்தச் சாலைகள் ‘செயல்திறன் அடிப்படையிலான பராமரிப்பு ஒப்பந்தம்’ (Performance-based Maintenance Contract) என்ற முறையில் பராமரிக்கப்படும்.
பொதுமக்கள் தங்கள் பகுதிகளில் உள்ள பழுதடைந்த சாலைகளை ‘நம்ம சாலை’ செயலி (Namma Saalai App) மூலம் புகைப்படம் எடுத்துத் தகவல் தெரிவித்தால், அந்தக் குறைபாடுகள் உடனடியாகச் சீரமைக்கப்படும் என அரசு தரப்பில் தெரிவிக்கப்பட்டுள்ளது.
