நடிகர் சூரி கதாநாயகனாக நடித்து கடந்த செப்டம்பர் 10-ஆம் தேதி திரையரங்குகளில் வெளியான 'மண்டாடி' திரைப்படம் ரசிகர்கள் மத்தியிலும் விமர்சகர்கள் மத்தியிலும் அமோக வரவேற்பைப் பெற்று வருகிறது.
மீனவர்களின் வாழ்வியலையும், அவர்களின் பாரம்பரிய படகுப் போட்டிகளையும் மையமாகக் கொண்டு உருவாகியுள்ள இத்திரைப்படத்தில் சத்யராஜ், மஹிமா நம்பியார், மிதுன் ஜெய்சங்கர், சுஹாஸ் உள்ளிட்ட பலர் முக்கியக் கதாபாத்திரங்களில் நடித்துள்ளனர். தமிழ் மற்றும் தெலுங்கு மொழிகளில் வெளியான இத்திரைப்படம் முதல் நாளில் ரூ. 4.70 கோடியும், உலகம் முழுவதும் முதல் 3 நாள்களில் ரூ. 30 கோடி வரை வசூலித்தும் சாதனை படைத்துள்ளது. சூரி கதாநாயகனாக நடித்த படங்களிலேயே இதுவே மிக அதிக வசூல் சாதனை படைக்கும் படமாக இருக்கும் என எதிர்பார்க்கப்படுகிறது.
இப்படத்தில் சூரியின் சிறப்பான நடிப்பைப் பாராட்டி பலரும் வாழ்த்துகளைத் தெரிவித்து வரும் நிலையில், சூப்பர் ஸ்டார் ரஜினிகாந்த் தொலைபேசி வாயிலாக சூரியை நேரடியாகத் தொடர்புகொண்டு தன் மனமார்ந்த வாழ்த்துகளைத் தெரிவித்துள்ளார்.
இதுகுறித்து நடிகர் சூரி தனது சமூக ஊடகப் பக்கத்தில், ரஜினிகாந்துடன் தொலைபேசியில் பேசிய தருணத்தின் புகைப்படத்தைப் பகிர்ந்து பதிவு ஒன்றையும் வெளியிட்டுள்ளார். அதில், "சூப்பர் ஸ்டார் ரஜினிகாந்த் அவர்கள் 'மண்டாடி' படத்தைப் பார்த்து ரசித்துள்ளார். அவர் மனதார போனில் அழைத்து வாழ்த்தியது எனக்கும் எங்கள் படக்குழுவிற்கும் மிகவும் முக்கியமானது. மறுமுனையில் அவரது குரலைக் கேட்ட அந்த விலைமதிப்பற்ற தருணத்தில் எடுக்கப்பட்ட புகைப்படம் இது. அவருடைய வார்த்தைகள் எனக்குக் கிடைத்த மிகப்பெரிய ஆசீர்வாதம்" எனக் குறிப்பிட்டு நெகிழ்ச்சி தெரிவித்துள்ளார்.
