மகாராஷ்டிராவில் உள்ள விவசாயிகளின் நீண்ட நாள் கோரிக்கையை ஏற்கும் வகையில், ரூ. 2 லட்சம் வரையிலான பயிர்க் கடன்களை தள்ளுபடி செய்ய மாநில அமைச்சரவை இன்று (ஜூன் 2, 2026) ஒப்புதல் அளித்துள்ளது.
விவசாயிகளின் பொருளாதாரச் சுமையைக் குறைக்கும் இந்த வரலாற்றுச் சிறப்புமிக்க திட்டத்திற்காக மாநில அரசு ரூ. 36,585 கோடி நிதியை ஒதுக்கியுள்ளது.
மாநில அரசின் அறிவிப்பின்படி, 2019 ஏப்ரல் 1 முதல் 2026 மார்ச் 31 ஆம் தேதி வரையிலான காலகட்டத்தில் வங்கிகளில் பயிர்க்கடன் பெற்று, அதனைத் திருப்பிச் செலுத்த முடியாமல் தவிக்கும் அனைத்து விவசாயிகளுக்கும் இந்த ரூ. 2 லட்சம் வரையிலான கடன் தள்ளுபடி பொருந்தும் எனத் தெரிவிக்கப்பட்டுள்ளது.
கடந்த 2024 ஆம் ஆண்டு நடைபெற்ற சட்டப்பேரவைத் தேர்தலின் போது ஆளுங்கட்சி அளித்த முக்கிய வாக்குறுதிகளில் இதுவும் ஒன்றாகும். அதன்படி, சமீபத்தில் 2026–27 ஆம் ஆண்டிற்கான ஆண்டு பட்ஜெட்டைச் சமர்ப்பித்தபோது, முதல்வர் தேவேந்திர ஃபட்னவீஸ் இத்திட்டத்தை முன்மொழிந்திருந்தார். தற்போது அதற்கு அமைச்சரவை கூட்டத்தில் அதிகாரப்பூர்வமாக ஒப்புதல் பெறப்பட்டுள்ளது.
இதுகுறித்து செய்தியாளர்களிடம் பேசிய முதல்வர் தேவேந்திர ஃபட்னவீஸ்:
"விவசாயிகளின் நலனைக் கருத்தில் கொண்டு, அவர்களின் பயிர்க்கடன்களை தள்ளுபடி செய்ய அமைச்சரவைக் கூட்டத்தில் ஒருமனதாக ஒப்புதல் அளிக்கப்பட்டுள்ளது."
அமைச்சரவை ஒப்புதல் அளித்துவிட்ட போதிலும், இதற்கான அரசாணை மற்றும் அதிகாரப்பூர்வ அறிவிப்பு இன்று வெளியாகாது என்று முதல்வர் ஃபட்னவீஸ் குறிப்பிட்டுள்ளார். வரும் ஜூன் 18-ஆம் தேதி மகாராஷ்டிராவில் 17 மாநில கவுன்சில் இடங்களுக்கான தேர்தல்கள் நடைபெற உள்ளதால், தேர்தல் நடத்தை விதிகள் அமலில் உள்ளன. எனவே, இந்திய தேர்தல் ஆணையத்தின் வழிகாட்டுதல்களின்படி, தேர்தல் முடிந்த பிறகே இதற்கான அதிகாரப்பூர்வ அறிவிப்பு வெளியாகும் என அவர் தெளிவுபடுத்தியுள்ளார்.
மாநில அரசின் இந்த அதிரடி நடவடிக்கை மகாராஷ்டிர மாநில விவசாயிகளிடையே பெரும் மகிழ்ச்சியையும் வரவேற்பையும் பெற்றுள்ளது.
