கேரள மாநிலம் பாறைசாலை அருகே ஏற்பட்ட நிலச்சரிவு காரணமாகத் தண்டவாளத்தில் மண் சரிந்து விழுந்ததில், அவ்வழியாக வந்த விரைவு ரயிலின் என்ஜின் தடம் புரண்டு விபத்துக்குள்ளானது. இதன் காரணமாக நாகர்கோவில் வழியாக இயக்கப்படும் பல தமிழக ரயில்கள் ரத்து செய்யப்பட்டுள்ளன.

அதிகாலையில் நடந்த விபத்து:

திருவனந்தபுரத்தில் உள்ள பாறைசாலை ரயில் நிலையம் அருகே வியாழக்கிழமை அதிகாலை 2 மணியளவில் தண்டவாளத்தில் திடீரென நிலச்சரிவு ஏற்பட்டது. அப்போது, அவ்வழியாக வந்த பிலாஸ்பூர் - திருநெல்வேலி எக்ஸ்பிரஸ் (22619) ரயிலின் என்ஜின் எதிர்பாராதவிதமாகத் தடம் புரண்டது.

இந்த விபத்தில் பயணிகள் மற்றும் ரயில்வே ஊழியர்கள் யாருக்கும் எவ்வித காயம் ஏற்படவில்லை என்று தெற்கு ரயில்வே நிர்வாகம் உடனடியாக விளக்கம் அளித்தது.

பயணிகளுக்கு மாற்று ஏற்பாடுகள்:

விபத்தைத் தொடர்ந்து, பிலாஸ்பூர் - திருநெல்வேலி எக்ஸ்பிரஸ் ரயில் நெய்யாற்றின்கரை - பாறைசாலை அருகே நிறுத்தப்பட்டது. அங்கிருந்து திருநெல்வேலி வரையிலான ரயில் சேவை பகுதியளவு ரத்து செய்யப்பட்டது. பாதிக்கப்பட்ட பயணிகள் பேருந்துகள் மூலம் திருநெல்வேலிக்கு அழைத்துச் செல்லப்பட்டனர்.

அதிகாலை முதலே தடம் புரண்ட என்ஜினை மீட்கும் நடவடிக்கைகளும், தண்டவாளத்தில் கொட்டிக் கிடந்த மண் சரிவை அகற்றும் பணிகளும் தீவிரமாக நடைபெற்றன.

ரத்து செய்யப்பட்ட ரயில்களின் விவரம்:

தண்டவாளம் சீரமைப்புப் பணிகள் காரணமாக பாறைசாலை வழியாக இயங்கும் பின்வரும் பயணிகள் ரயில்கள் ரத்து செய்யப்பட்டன:

ரயில் எண் 56306: திருவனந்தபுரம் வடக்கு - நாகர்கோவில் சந்திப்பு (காலை 6.30 மணி)

ரயில் எண் 56309: நாகர்கோவில் சந்திப்பு - திருவனந்தபுரம் வடக்கு (மாலை 6.20 மணி)

ரயில் எண் 56102: நாகர்கோவில் சந்திப்பு - கொல்லம் (காலை 6.25 மணி)

ரயில் எண் 56101: கொல்லம் - நாகர்கோவில் சந்திப்பு (காலை 3.35 மணி)

ரயில் எண் 56305: நாகர்கோவில் சந்திப்பு - திருவனந்தபுரம் வடக்கு (காலை 7.55 மணி)

ரயில் எண் 56310: திருவனந்தபுரம் வடக்கு - நாகர்கோவில் சந்திப்பு (பகல் 1.25 மணி)

பகுதியளவு ரத்து செய்யப்பட்ட ரயில்கள்:

பிலாஸ்பூர் - திருநெல்வேலி எக்ஸ்பிரஸ் (22619): அக்டோபர் 20-ல் புறப்பட்ட இந்த ரயில் நெய்யாற்றின்கரையுடன் நிறுத்தப்பட்டது.

தாம்பரம் - திருவனந்தபுரம் அம்ரித் பாரத் எக்ஸ்பிரஸ் (16121): அக்டோபர் 21 மாலை புறப்பட்ட இந்த ரயில் நாகர்கோவில் டவுன் வரை மட்டுமே இயக்கப்பட்டது.

திருவனந்தபுரம் - தாம்பரம் அம்ரித் பாரத் எக்ஸ்பிரஸ் (16122): திருவனந்தபுரத்திற்குப் பதிலாக, நாகர்கோவில் டவுன் நிலையத்திலிருந்து பகல் 11.47 மணிக்கு முறையே புறப்பட்டுச் சென்றது.

ரயில் சேவை சீரமைப்பு:

இதனிடையே, மண்சரிவு ஏற்பட்ட பகுதியில் தீவிர மீட்புப் பணிகள் மேற்கொள்ளப்பட்டு, தடம் புரண்ட ரயில் என்ஜின் வெற்றிகரமாகச் சீரமைக்கப்பட்டு அகற்றப்பட்டது. தற்போது அப்பகுதியில் தண்டவாளம் சீரமைக்கப்பட்டு ரயில் போக்குவரத்து மீண்டும் இயல்பு நிலைக்குத் திரும்பியுள்ளதாகத் தெற்கு ரயில்வே நிர்வாகம் அறிவித்துள்ளது.