சர்வதேச பாஸ்போர்ட் தரவரிசையில் இந்தியா 125-வது இடத்திற்குத் தள்ளப்பட்டதைக் குறிப்பிட்டு, பிரதமர் நரேந்திர மோடி தலைமையிலான மத்திய அரசின் கொள்கைகளே நாட்டின் உலகளாவிய நற்பெயர் சரிவதற்குக் காரணம் என்று காங்கிரஸ் தலைவர் மல்லிகார்ஜுன கார்கே திங்கள்கிழமை (ஜூலை 6) கடுமையாகக் குற்றம் சாட்டியுள்ளார்.
சமீபத்தில் வெளியான சர்வதேச பாஸ்போர்ட் குறியீட்டு (Passport Index) தரவரிசைப் பட்டியலை சுட்டிக்காட்டி, தனது அதிகாரப்பூர்வ 'எக்ஸ்' (ட்விட்டர்) சமூக வலைதளப் பக்கத்தில் அவர் இந்த விமர்சனங்களை முன்வைத்துள்ளார்.
கார்கேவின் எக்ஸ் பதிவு விபரம்:
மரியாதை எங்கே போனது?:
"வெளிநாடுகளுக்குப் பயணம் செய்பவர்களும் அங்கு வசிப்பவர்களும் இந்திய பாஸ்போர்ட்டின் மரியாதையையும் வலிமையையும் அறிவார்கள்" என்று கடந்த 2018 ஆம் ஆண்டில் பிரதமர் மோடி பெருமிதத்துடன் கூறினார். ஆனால், தற்போது அந்த வலிமை எங்கு போனது? என்று கார்கே கேள்வி எழுப்பியுள்ளார்.
தரவரிசையில் வீழ்ச்சி: கடந்த 2013 ஆம் ஆண்டில் சர்வதேச பாஸ்போர்ட் தரவரிசையில் 74 வது இடத்தில் இருந்த இந்தியா, 2026-ல் 80-வது இடத்திற்குச் சரிந்துள்ளது. மேலும், தற்போது வெளியாகியுள்ள மற்றொரு சர்வதேச பாஸ்போர்ட் குறியீட்டில் இந்தியா மிகவும் மோசமான முறையில் 125-வது இடத்திற்குத் தள்ளப்பட்டுள்ளது. மோடி அரசின் தவறான கொள்கைகளே இந்தியாவின் உலகளாவிய நற்பெயருக்குக் களங்கம் விளைவித்துள்ளன.
கட்டண உயர்வு சுமை: மறுபுறம், மோடி அரசானது பாஸ்போர்ட் பெறுவதற்கான கட்டணங்களை பெருமளவு உயர்த்தியுள்ளது. சாதாரண பாஸ்போர்ட் கட்டணம் ரூ. 1,500-லிருந்து ரூ. 2,500 ஆகவும், தட்கல் (Tatkal) முறையிலான பாஸ்போர்ட் கட்டணம் ரூ. 5,000 ஆகவும் அதிகரிக்கப்பட்டு பொதுமக்கள் மீது கூடுதல் சுமை ஏற்றப்பட்டுள்ளது.
சுற்றுலாப் பயணிகள் வருகை குறைவு: இந்தியாவுக்குப் பயணம் செய்வதில் உள்ள எளிமையைக் கருத்தில் கொண்டு பார்த்தால் கூட, நாட்டிற்கு வரும் வெளிநாட்டு சுற்றுலாப் பயணிகளின் வருகையானது, கரோனா-19 பெருந்தொற்றுக்கு முந்தைய காலகட்டத்தை விட தற்போது மிகக் குறைவாகவே உள்ளது என்றும் மல்லிகார்ஜுன கார்கே சுட்டிக்காட்டியுள்ளார்.
சர்வதேச அளவில் இந்திய பாஸ்போர்ட்டின் தரம் மற்றும் கட்டண உயர்வு குறித்து எதிர்க்கட்சித் தலைவர் வெளியிட்டுள்ள இந்த அறிக்கை தற்போது அரசியல் வட்டாரத்தில் பெரும் விவாதத்தைக் கிளப்பியுள்ளது.
