இசைஞானி இளையராஜாவின் பிறந்தநாளையொட்டி வாழ்த்து தெரிவித்த தமிழக முதலமைச்சர் விஜய்க்கு, அவர் ஆடியோ பதிவு ஒன்றின் மூலம் தனது நெஞ்சார்ந்த நன்றியைத் தெரிவித்துள்ளார்.
இன்று தனது பிறந்தநாளைக் கொண்டாடும் இசைஞானி இளையராஜாவுக்கு அரசியல் தலைவர்கள், சினிமா பிரபலங்கள் மற்றும் ரசிகர்கள் எனப் பலரும் வாழ்த்துகளைக் குவித்து வருகின்றனர். அந்த வகையில், தமிழக முதலமைச்சர் விஜய் தனது எக்ஸ் (X) தள பக்கத்தில் இளையராஜாவைப் பாராட்டி விரிவான வாழ்த்துச் செய்தி ஒன்றைப் பதிவிட்டிருந்தார்.
அதில் அவர் குறிப்பிட்டதாவது:
"இசைஞானி இளையராஜாவுக்கு இனிய பிறந்தநாள் நல்வாழ்த்துகள்! தேனி மாவட்டம், பண்ணைப்புரம் என்ற கிராமத்தில் பிறந்து, தனது சகோதரர்களுடன் இசைப் பயணத்தைத் தொடங்கி, 'அன்னக்கிளி' திரைப்படத்தின் மூலமாக திரைத்துறையில் கால்பதித்து, உலகப் புகழ்வாய்ந்த சிம்பொனி இசை வரை பல சாதனைகளைப் படைத்து, இசை உலகின் மகுடமாகத் திகழ்ந்துவரும் இசைஞானி இளையராஜா தமிழ்நாட்டிற்குப் பெருமை சேர்த்து வருகிறார்.
உங்கள் இசை இன்னும் பல தலைமுறைகளுக்கு வழிகாட்டும் ஒளியாகவும், ஊக்கமாகவும் தொடர்ந்து ஒலிக்கட்டும். தமிழர்களின் பெருமையாக விளங்கும் தங்களுக்கு எங்களின் அன்பும், மரியாதையும் கலந்த இனிய பிறந்தநாள் நல்வாழ்த்துகள்!"
முதலமைச்சரின் இந்த அன்பான வாழ்த்துக்கு நன்றி தெரிவிக்கும் விதமாக, இளையராஜா தனது அதிகாரப்பூர்வ பக்கத்தில் ஒரு பதிவை வெளியிட்டுள்ளார். முதலமைச்சர் விஜய்யின் புகைப்படத்துடன் கூடிய அந்த ஆடியோ பதிவில் இளையராஜா பேசியதாவது:
"பிறந்த நாள் வாழ்த்துச் செய்தி அனுப்பிய முதல்வர் விஜய் அவர்களுக்கு நன்றியைத் தெரிவித்துக்கொள்கிறேன்."
முன்னதாக, திமுக தலைவரும் சட்டமன்ற எதிர்க்கட்சித் தலைவருமான மு.க. ஸ்டாலின் அனுப்பிய வாழ்த்துச் செய்திக்கும் இளையராஜா வீடியோ பதிவு ஒன்றின் மூலம் தனது நன்றியைப் பகிர்ந்திருந்தார் என்பது குறிப்பிடத்தக்கது.
இசை உலகின் சக்கரவர்த்தியாகத் திகழும் இளையராஜாவுக்கு, தமிழகத்தின் முக்கிய அரசியல் தலைவர்கள் போட்டி போட்டு வாழ்த்து தெரிவிப்பதும், அதற்கு அவர் தனித்தனியே வீடியோ மற்றும் ஆடியோக்கள் மூலம் பதிலளிப்பதும் சமூக வலைத்தளங்களில் தற்போது பெரும் வைரலாகி வருகிறது.
