சின்னத்திரையில் இருந்து வெள்ளித்திரைக்கு வந்து முன்னணி நடிகராக வளர்ந்துள்ள கவின் மற்றும் லேடி சூப்பர் ஸ்டார் நயன்தாரா முதன்முறையாக இணைந்து நடித்துள்ள 'ஹாய்' திரைப்படத்தின் அதிகாரபூர்வ வெளியீட்டுத் தேதி அறிவிக்கப்பட்டுள்ளது.
அறிமுக இயக்குநர் விஷ்ணு எடவன் இயக்கத்தில் உருவாகியுள்ள இத்திரைப்படம், ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது.
இந்தப் படத்தினை தமிழ் சினிமாவின் முன்னணி தயாரிப்பு நிறுவனமான ‘7 ஸ்கிரீன் ஸ்டுடியோஸ்’ மற்றும் இயக்குநர் விக்னேஷ் சிவனின் ‘ரௌடி பிக்சர்ஸ்’ ஆகிய நிறுவனங்கள் இணைந்து பிரம்மாண்டமாகத் தயாரித்துள்ளன. இப்படத்திற்கு ஜென் மார்டின் இசையமைத்துள்ளார். சமீபத்தில் வெளியான இப்படத்தின் பாடல்கள் ரசிகர்கள் மத்தியில் நல்ல வரவேற்பைப் பெற்று, படத்தின் மீதான எதிர்பார்ப்பை மேலும் அதிகரித்துள்ளது.
இந்நிலையில், படத்தின் ரிலீஸ் குறித்த முக்கிய அறிவிப்பை படக்குழு இன்று வெளியிட்டுள்ளது. அதன்படி, தணிக்கை வாரியம் (Censor Board) இத்திரைப்படத்துக்கு 'யூ/ஏ' (U/A) சான்றிதழ் வழங்கியுள்ளது. மேலும், திரைப்படம் வரும் ஆகஸ்ட் 14 ஆம் தேதி உலகம் முழுவதும் உள்ள திரையரங்குகளில் வெளியாகவுள்ளதாகவும் படக்குழு அதிகாரபூர்வமாக அறிவித்துள்ளது.
சுதந்திர தின வார விடுமுறையைக் குறிவைத்து 'ஹாய்' திரைப்படம் களமிறங்கும் அதே நாளில், நடிகர் சூர்யா நடித்துள்ள 'விஸ்வநாத் அண்ட் சன்ஸ்' திரைப்படமும் வெளியாகவுள்ளது குறிப்பிடத்தக்கது. ஒரே நாளில் இரண்டு முக்கியத் திரைப்படங்கள் வெளியாவதால், இந்த ஆகஸ்ட் மாத பாக்ஸ் ஆபீஸ் ரேஸ் சினிமா வட்டாரத்தில் பெரும் சுவாரசியத்தை ஏற்படுத்தியுள்ளது.
