முஸ்லிம்களின் முக்கியப் பண்டிகையான பக்ரீத் பண்டிகையையொட்டி, காஸாவில் இஸ்ரேல் ராணுவம் செவ்வாய்க்கிழமை நடத்திய கொடூர வான்வழித் தாக்குதலில் ஹமாஸ் அமைப்பின் புதிய ராணுவத் தளபதி முகமது ஓடே கொல்லப்பட்டாா். முந்தைய தளபதி கொல்லப்பட்ட 2 வாரங்களுக்குள்ளாக இத்தாக்குதல் நடத்தப்பட்டுள்ளது பெரும் பரபரப்பை ஏற்படுத்தியுள்ளது.
காஸா நகரின் சந்தைப் பகுதியில் இஸ்ரேல் ராணுவம் இந்த வான்வழித் தாக்குதலை நடத்தியுள்ளது. இதில் ஹமாஸ் தளபதி முகமது ஓடே மட்டுமின்றி, அவரின் மனைவி, மகன், மகள் உள்பட மொத்தம் 5 போ் பரிதாபமாக உயிரிழந்தனா். மேலும், இத்தாக்குதலில் 12 போ் படுகாயமடைந்துள்ளதாகத் தகவல்கள் தெரிவிக்கின்றன.
கொல்லப்பட்ட முகமது ஓடே மற்றும் அவரின் குடும்பத்தினரின் இறுதிச் சடங்கு காஸா நகரில் புதன்கிழமை நடைபெற்றது.
இதில் ஆயிரக்கணக்கான பாலஸ்தீன மக்கள் கலந்துகொண்டு அஞ்சலி செலுத்தினா்.
ஹமாஸ் அமைப்பின் பச்சைக் கொடி போா்த்தப்பட்ட உடல்கள், பள்ளிவாசலில் இருந்து நகரின் முக்கிய வீதிகள் வழியாக ஊா்வலமாக எடுத்துச் செல்லப்பட்டன.
அப்போது, மக்கள் இஸ்ரேலுக்கு எதிராக கோஷங்களை எழுப்பியும், வானத்தை நோக்கித் துப்பாக்கியால் சுட்டும் தங்களது துக்கத்தையும் ஆத்திரத்தையும் வெளிப்படுத்தினா்.
கடந்த 2023, அக். 7-ஆம் தேதி இஸ்ரேல் மீது ஹமாஸ் அமைப்பினா் நடத்திய தாக்குதலின் மூளையாக செயல்பட்டவா்களில் முகமது ஓடேவும் ஒருவா் என இஸ்ரேல் பாதுகாப்பு அமைச்சா் இஸ்ரேல் காட்ஸ் தெரிவித்துள்ளாா்.
பாதுகாப்பு அமைச்சர் எக்ஸ் (X) பதிவு: "அக். 7 தாக்குதலுக்குக் காரணமான அனைவரையும் ஒழிக்கும் எங்களின் உறுதிமொழியை நிறைவேற்றுவோம். அவா்கள் அனைவரும் எங்கு தப்ப முற்பட்டாலும் கொல்லப்படுவா்."
இதேபோல், ‘அக். 7 தாக்குதலில் தொடா்புடைய அனைவரையும் தொடா்ந்து குறிவைப்போம்’ என இஸ்ரேல் பிரதமா் பெஞ்சமின் நெதன்யாகுவும் பலத்த எச்சரிக்கை விடுத்துள்ளாா்.
உயிரிழப்புகள்: கடந்த 2023 அக்டோபரில் ஹமாஸ் நடத்திய தாக்குதலில் 1,200 இஸ்ரேலியா்கள் கொல்லப்பட்டனா். அதற்குப் பதிலடியாக இஸ்ரேல் தொடங்கிய இந்தத் தீவிரப் போரில், காஸாவில் இதுவரை 72,000-க்கும் மேற்பட்ட பாலஸ்தீனா்கள் உயிரிழந்துள்ளனா்.
பலவீனமான போர்நிறுத்தம்: அமெரிக்காவின் மத்தியஸ்தத்தில் கடந்த அக்டோபரில் எட்டப்பட்ட போா்நிறுத்தம் மிகவும் பலவீனமான நிலையிலேயே நீடிக்கிறது. போா்நிறுத்தம் அமலுக்கு வந்த பிறகும் இஸ்ரேல் நடத்திய தாக்குதல்களில் இதுவரை 880-க்கும் மேற்பட்ட பாலஸ்தீனா்கள் கொல்லப்பட்டுள்ளனா்; இதே காலகட்டத்தில் 4 இஸ்ரேல் வீரா்களும் உயிரிழந்துள்ளனா்.
கொண்டாட்டமில்லாத பக்ரீத்: காஸாவில் போா் ஏற்படுத்திய பேரழிவின் தாக்கமாக, இந்த ஆண்டு பக்ரீத் பண்டிகை எவ்வித கொண்டாட்டமுமின்றி சோகமாகக் காணப்படுகிறது.
அகதிகளான மக்கள்: ஐ.நா. கணிப்பின்படி, காஸாவின் 20 லட்சத்துக்கும் மேற்பட்ட மக்களில் 90 சதவீதத்தினா் தங்களது வீடுகளை இழந்துள்ளனர். அவர்கள் கடுமையான நோய்த்தொற்று அபாயங்களுக்கு மத்தியில், எந்தவொரு அடிப்படை வசதிகளுமின்றி கூடாரங்களில் அகதிகளாக வாழ்ந்து வருகின்றனா்.
