திமுகவை விமர்சித்து வைகோ பேசுவது தனக்கும் வருத்தமளிப்பதாக திமுக பொதுச்செயலாளரும், அமைச்சருமான துரைமுருகன் தெரிவித்துள்ளார். மேலும், தன் மீதான தேர்தல் வழக்கை சென்னை உயர்நீதிமன்றம் தள்ளுபடி செய்தது குறித்து "நீதி வென்றிருக்கிறது" என்றும் அவர் குறிப்பிட்டுள்ளார்.
வேலூர் மாவட்டம் காட்பாடி காந்திநகர் பகுதியில் உள்ள தனது இல்லத்தில் துரைமுருகன் செய்தியாளர்களைச் சந்தித்தார். அப்போது பல்வேறு கேள்விகளுக்கு அவர் அளித்த பதில்கள் வருமாறு:
கடந்த 2021-ஆம் ஆண்டு நடைபெற்ற சட்டமன்றத் தேர்தலில் காட்பாடி தொகுதியில் துரைமுருகன் பெற்ற வெற்றியை எதிர்த்து, அதிமுக வேட்பாளர் வி.ராமு சென்னை உயர்நீதிமன்றத்தில் வழக்குத் தொடர்ந்திருந்தார். இந்த வழக்கை நீதிமன்றம் தற்போது தள்ளுபடி செய்து தீர்ப்பளித்துள்ளது.
இதுகுறித்த செய்தியாளர்களின் கேள்விக்கு பதிலளித்த துரைமுருகன், மிகச் சுருக்கமாக "நீதி வென்றிருக்கிறது" என்று தனது மகிழ்ச்சியை வெளிப்படுத்தினார்.
முன்பு திமுகவில் முக்கிய அங்கமாக வகித்துவிட்டு, தற்போது திமுகவை தொடர்ந்து மிகக் கடுமையாக விமர்சித்து வருபவர் குறித்த கேள்வி செய்தியாளர்களால் எழுப்பப்பட்டது. இக்கேள்வியைக் கேட்டவுடன், துரைமுருகன் சற்றென்று தனது வழக்கமான பாணியில் கைகளைக் கூப்பிக் கும்பிட்டார்.
இருப்பினும் செய்தியாளர்கள் விடாமல், "அவர் (வைகோ) உங்களுடைய நீண்டகால நண்பர் அல்லவா?" என்று மீண்டும் கேள்வி எழுப்பினர். அதற்கு பதிலளித்த
துரைமுருகன்:
"திமுகவை விமர்சித்து வைகோ பேசுவது எனக்கும் வருத்தமான ஒன்றுதான்"
என்று மிகவும் சுருக்கமாகவும், அதே சமயம் தனது மனவருத்தத்தை வெளிப்படுத்தும் விதமாகவும் கூறிவிட்டுச் சென்றார். நீண்டகால அரசியல் நட்பு மற்றும் தற்போதைய அரசியல் சூழல் குறித்த துரைமுருகனின் இந்த கருத்து அரசியல் வட்டாரத்தில் உற்று நோக்கத்தக்கதாக மாறியுள்ளது.
