குழந்தைத் தொழிலாளர்கள் இல்லாத மாநிலமாக தமிழ்நாட்டை உருவாக்குவோம்: முதல்வர் ச. ஜோசப் விஜய் அறிக்கை!

"குழந்தைத் தொழிலாளர்கள் உழைப்பின் மூலம் பெறப்படும் வருமானம் வீட்டிற்கும், நாட்டிற்கும் சிறுமை என்பதை பெற்றோர்களும் சமூகமும் உணர வேண்டும்; தமிழ்நாட்டை குழந்தைத் தொழிலாளர்கள் இல்லாத மாநிலமாக மாற்ற அனைவரும் துணை நிற்க வேண்டும்" என தமிழக முதல்வர் ச. ஜோசப் விஜய் வலியுறுத்தியுள்ளார்.

ஜூன் 12-ஆம் நாள் கடைபிடிக்கப்படும் 'குழந்தைத் தொழிலாளர் முறை எதிர்ப்பு நாளை' முன்னிட்டு முதல்வர் விஜய் வெளியிட்டுள்ள அறிக்கையில் இவ்வாறு தெரிவித்துள்ளார்.

கல்வி பயிலும் இனிய பருவமே குழந்தைப் பருவம்:

அவர் விடுத்துள்ள அறிக்கையில் குறிப்பிட்டதாவது:

"துள்ளித் திரிந்து விளையாடி, பள்ளிக்குச் சென்று கல்வி பயிலும் இனிய பருவமே குழந்தைப் பருவமாகும். இப்பருவத்தில், பல்வேறு குடும்பச் சூழ்நிலைகளால் வேலைக்குச் செல்கின்ற குழந்தைகளை, அக்கொடுமையிலிருந்து விடுவித்து, அவர்களுக்கு இனிமையான குழந்தைப் பருவத்தினையும், முறையான கல்வியினையும் வழங்கிட வேண்டியது நம் அனைவரின் கடமையாகும்."

இயற்கை நியதிக்கும், சமூக நீதிக்கும் எதிரானது:

ஒவ்வொரு குழந்தைக்கும் சுதந்திரமாக வாழும் உரிமை, பாதுகாப்பு உரிமை, கல்வி உரிமை போன்றவை அவசியமானதாகும். இவற்றை வழங்க மறுப்பது இயற்கை நியதிக்கும், சமூக நீதிக்கும் எதிரானதாகும் என்று முதல்வர் சுட்டிக்காட்டியுள்ளார்.

மேலும், குழந்தைகளின் மகிழ்ச்சியான வாழ்க்கைக்கு எதிராக எவ்வகையான தொழில்களிலும் குழந்தைகளைப் பணியமர்த்தக் கூடாது என்றும், வளரிளம் பருவத்தினரை (Adolescents) அபாயகரமான தொழில்களில் பணியமர்த்தக் கூடாது என்றும் அவர் வலியுறுத்தியுள்ளார்.

தமிழ்நாடு அரசின் முக்கியக் குறிக்கோள்:

குழந்தைகளைத் தொழிற்பணிகளில் ஈடுபடுத்தாமல் அவர்களுக்கான உரிமைகளைப் பேணிக்காத்து, முறையான கல்வி அளித்து, வளமான எதிர்காலத்தை உருவாக்குவதையே தமிழ்நாடு அரசு தனது முக்கியக் குறிக்கோளாகக் கொண்டுள்ளது. அதனடிப்படையில், குழந்தைத் தொழிலாளர் முறையை ஒழித்திட தமிழ்நாடு அரசு பல்வேறு முனைப்பான திட்டங்களைச் செயல்படுத்தி வருகிறது.

முதல்வர் விஜய் விடுத்துள்ள வேண்டுகோள்:

வளமான எதிர்காலத்தை உருவாக்க அரசு எடுக்கும் முன்னெடுப்புகளுக்கு சமூகமும், பெற்றோர்களும் முழு ஒத்துழைப்பு அளிக்க வேண்டும் எனக் கேட்டுக்கொண்ட முதல்வர் விஜய், "குழந்தைத் தொழிலாளர் முறையை முற்றிலும் ஒழித்திட தமிழ்நாடு அரசு செயல்படுத்தும் முன்னெடுப்புகளுக்குத் துணை நின்று, குழந்தைத் தொழிலாளர்கள் இல்லாத மாநிலமாக தமிழ்நாட்டை உருவாக்கிடுவோம்" என்று தனது அறிக்கையில் உறுதியளித்துள்ளார்.