தமிழக சட்டப்பேரவையில் இன்று (ஆகஸ்ட் 19) 110-வது விதியின் கீழ் முதலமைச்சர் விஜய் சுகாதாரத் துறை தொடர்பாக பல்வேறு முக்கிய புதிய அறிவிப்புகளை வெளியிட்டார்.
சுகாதாரத் துறையை வலுப்படுத்தும் நோக்கில் வெளியிடப்பட்ட முக்கிய அறிவிப்புகளின் விவரங்கள்:
மருத்துவக் காப்பீடு உயர்வு: முதல்வரின் விரிவான மருத்துவக் காப்பீட்டுத் திட்டத்தின் கீழ் இலவச மருத்துவ சிகிச்சைக்கான ஆண்டுக் காப்பீட்டுத் தொகை தற்போதுள்ள ரூ. 5 லட்சத்திலிருந்து ரூ. 25 லட்சமாக உயர்த்தப்படுகிறது.
திருநங்கையருக்கான சேவை விரிவாக்கம்: சென்னை ஸ்டான்லி, திருநெல்வேலி, தூத்துக்குடி, செங்கல்பட்டு, திருவாரூர், தருமபுரி மற்றும் கன்னியாகுமரி ஆகிய 7 அரசு மருத்துவக் கல்லூரி மருத்துவமனைகளில் திருநங்கைகளுக்கான சிறப்பு மருத்துவம் மற்றும் அறுவைச் சிகிச்சை சேவைகள் காப்பீட்டுத் திட்டத்தின் கீழ் கூடுதலாக வழங்கப்படும்.
6,098 கூடுதல் மருத்துவ இடங்கள்: தரமான மருத்துவக் கல்வி மற்றும் சேவைக்காக ரூ. 351 கோடி மதிப்பீட்டில் 7 புதிய அரசு செவிலியர் கல்லூரிகள் தொடங்கப்பட்டு, செவிலியர், மருந்தியல் மற்றும் துணை மருத்துவப் படிப்புகளில் மொத்தம் 6,098 கூடுதல் இடங்கள் உருவாக்கப்படும்.
முதல்வரின் புற்றுநோய் பராமரிப்பு இயக்கம்: புற்றுநோய் தடுப்பு மற்றும் சிகிச்சைக்கான கட்டமைப்பு ரூ. 667.44 கோடி மதிப்பீட்டில் மேம்படுத்தப்படும். சென்னை ராஜீவ் காந்தி அரசு பொது மருத்துவமனையில் ரூ. 471.80 கோடியில் 14 தளங்களுடன் கூடிய ஒருங்கிணைந்த புற்றுநோய் சிகிச்சை மையம் அமைக்கப்படுவதோடு, 5 மண்டல புற்றுநோய் மையங்களும் நிறுவப்படும்.
