பாலிவுட் திரையுலகின் முன்னணி நட்சத்திரமான நடிகர் ஆமீர் கான் (61), தனது மூன்றாவது திருமணம் குறித்த தகவலை அதிகாரப்பூர்வமாக உறுதிப்படுத்தியுள்ளார். நீண்ட நாட்களாகப் பரவி வந்த வதந்திகளுக்கு முற்றுப்புள்ளி வைக்கும் வகையில், திருமணத் தேதியையும் அவர் வெளியிட்டுள்ளார்.
"தற்போது நான் அமெரிக்காவுக்குச் சென்றுகொண்டிருக்கிறேன். எனது திருமணம் குறித்த தகவல்கள் உண்மையானதுதான். வரும் ஜூலை 5ஆம் தேதி எங்கள் திருமணம் நடைபெற இருக்கிறது."
ஆமீர் கானின் புதிய காதலி கௌரி ஸ்ப்ராட் (47) ஆவார். இவர் பெங்களூரில் சொந்தமாக 'வெல்னஸ் மற்றும் பியூட்டி ஸ்பேஸ்' (Wellness & Beauty Space) தொழில் செய்து வரும் ஒரு தொழில்முனைவோர் ஆவார். இவருக்கு ஏற்கனவே ஒரு மகன் உள்ளார். ஆமீர் கானும், கௌரியும் கடந்த 25 ஆண்டுகாலமாக நண்பர்களாகப் பழகி வந்துள்ளனர்.
கடந்த மார்ச் 2025-ல் கௌரியை ஆமீர் கான் அதிகாரப்பூர்வமாக அறிமுகப்படுத்தியதோடு, தாங்கள் இருவரும் ஓராண்டாக 'லிவிங்-டுகெதர்' (Living-together) முறையில் ஒன்றாக வாழ்ந்து வருவதாகவும் தெரிவித்திருந்தார்.
ஆமீர் கான் முதலில் 1986-ல் தயாரிப்பாளர் ரீனா தட்டைத் திருமணம் செய்தார். இவர்களுக்கு ஜுனைத் கான் என்ற மகனும், இரா கான் என்ற மகளும் உள்ளனர். 2002-ல் இவர்கள் விவாகரத்து பெற்றனர்.
2005-ல் கிரண் ராவைத் திருமணம் செய்தார். 2021-ல் இருவரும் பிரிந்தனர். இருப்பினும், தங்களது மகன் ஆசாத்தின் நலனுக்காக இருவரும் இப்போதும் நட்பு ரீதியாக இணைந்து செயல்பட்டு வருகின்றனர்.
61 வயதில் ஆமீர் கான் தனது 25 ஆண்டுகாலத் தோழியை 3-வது முறையாகக் கரம்பிடிக்க உள்ள இந்தத் தகவல் பாலிவுட் வட்டாரத்திலும், இணையத்திலும் தற்போதைய பேசுபொருளாக மாறியுள்ளது.
