தமிழ்நாடு நகர்ப்புற வாழ்விட மேம்பாட்டு வாரியத்தின் புதிய தலைவராக தமிழக வெற்றிக் கழகத்தின் (தவெக) முக்கிய நிர்வாகி கு.ப. கிருஷ்ணன் நியமிக்கப்பட்டுள்ளார். இதற்கான அதிகாரப்பூர்வ அரசாணையை தமிழக முதல்வர் ச. ஜோசப் விஜய் இன்று வெளியிட்டுள்ளார்.
வெள்ளிக்கிழமை (மே 22) வெளியான இந்த அரசாணையில் குறிப்பிடப்பட்டிருப்பதாவது:
"ஏழை, எளிய மக்களின் வாழ்விடங்களை மேம்படுத்தும் உன்னத நோக்கத்தோடு உருவாக்கப்பட்டது தமிழ்நாடு நகர்ப்புற வாழ்விட மேம்பாட்டு வாரியம். இதன் மூலம் புதிய குடியிருப்புகளை உருவாக்குதல் மற்றும் உறைவிடங்களை முறைப்படுத்தி மறுகுடியமர்வு செய்தல் போன்ற மிக முக்கியமான பணிகள் தொடர்ந்து மேற்கொள்ளப்பட்டு வருகின்றன.
இந்த பல்வேறு நலத்திட்டங்களை இன்னும் தொய்வின்றி, பரவலாகக் கொண்டு சேர்க்கும் வகையில், தமிழ்நாடு நகர்ப்புற வாழ்விட மேம்பாட்டு வாரியத்தின் தலைவராக கு.ப. கிருஷ்ணனை நியமனம் செய்து தமிழக முதல்வர் ச. ஜோசப் விஜய் இன்று ஆணையிட்டுள்ளார்."
சமீபத்தில் நடந்து முடிந்த தமிழக சட்டப்பேரவைத் தேர்தலில், திருச்சி மாவட்டத்தின் லால்குடி சட்டமன்றத் தொகுதியில் தமிழக வெற்றிக் கழகத்தின் சார்பில் கு.ப. கிருஷ்ணன் போட்டியிட்டார். விறுவிறுப்பாக நடைபெற்ற அந்தத் தேர்தலில், அதிமுக வேட்பாளர் லீமாரோஸிடம் 2,739 வாக்குகள் வித்தியாசத்தில் அவர் நூலிழையில் தோல்வியடைந்தது குறிப்பிடத்தக்கது.
தேர்தல் தோல்விக்குப் பின்னும் அவரது மக்கள் பணியைக் கணக்கில் கொண்டு, இந்த முக்கியப் பொறுப்பு அவருக்கு வழங்கப்பட்டிருப்பதாக அரசியல் வட்டாரங்கள் தெரிவிக்கின்றன.