திமுக கூட்டணியை உடைக்கப் பலரும் முயற்சித்தார்கள்; என்னை வைத்தே அந்த முயற்சியும் நடந்தது" என்று விடுதலைச் சிறுத்தைகள் கட்சி (விசிக) தலைவர் தொல். திருமாவளவன் பரபரப்பு குற்றச்சாட்டைச் சுமத்தியுள்ளார்.
திருச்சியில் செய்தியாளர்களைச் சந்தித்த அவர், திமுக கூட்டணி மற்றும் அதன் எதிர்காலம் குறித்துப் பேசியதாவது:
"திமுக கூட்டணியைப் பாதுகாக்க வேண்டும் என்ற பொறுப்புணர்வுடன் இயங்கிய கட்சி விடுதலைச் சிறுத்தைகள் கட்சி. தேர்தலுக்கு முன்பே திமுக கூட்டணியை உடைப்பதற்குப் பலரும் முயற்சிகளை மேற்கொண்டார்கள். ஏன், என்னை வைத்தே அந்தக் கூட்டணியை உடைக்கும் முயற்சியும் நடந்தது. ஆனால், நான் அதற்கு இணங்கவில்லை."
தேர்தலுக்குப் பிந்தைய கூட்டணி நிலைப்பாடு குறித்துப் பேசிய அவர், கூட்டணியைத் தக்கவைக்கும் பொறுப்பு தன்னிடம் இல்லை என்பதைத் தெளிவுபடுத்தினார்.
பொறுப்பு எனக்கு இல்லை: "தேர்தலுக்குப் பின்னர் இந்தக் கூட்டணியைக் கட்டிக் காப்பாற்ற வேண்டிய பொறுப்பு, என்னைப் போன்றவர்களுக்கு இல்லை. அதற்கான வலிமையும் எனக்கு இல்லை."
திமுகவிற்குப் பதில்: "ஆகவே, கூட்டணி குறித்தும், அதனைத் தக்கவைப்பது குறித்தும் எழும் கேள்விகளுக்குப் பதில் கூற வேண்டிய பொறுப்பு திமுக தலைமைக்குத்தான் உள்ளது."
தேர்தலுக்குப் பிறகு திமுக கூட்டணிக்குள் சலசலப்புகள் நிலவி வருவதாக அரசியல் வட்டாரங்களில் பேசப்பட்டு வரும் சூழலில், திருமாவளவனின் இந்த வெளிப்படையான பேட்டி தமிழக அரசியலில் பெரும் பரபரப்பை ஏற்படுத்தியுள்ளது.