தமிழகத்தில் அடுத்தடுத்து நடந்த பயங்கர விபத்துகள்: 5 பள்ளி மாணவர்கள் பரிதாப பலி!

தமிழகத்தில் திருவாரூர் மற்றும் கள்ளக்குறிச்சி ஆகிய இரு வேறு இடங்களில் இன்று மாலை நடந்த கோர சாலை விபத்துகளில், பள்ளி மாணவர்கள் 5 பேர் சம்பவ இடத்திலேயே பரிதாபமாக உயிரிழந்தனர். இச்சம்பவங்கள் அப்பகுதிகளில் பெரும் சோகத்தை ஏற்படுத்தியுள்ளன.

திருவாரூர் மாவட்டம் மன்னார்குடி அடுத்த காரக்கோட்டை அருகே இன்று மாலை இக்கோர விபத்து நிகழ்ந்துள்ளது. அங்குள்ள அரசுப் பள்ளியில் படிக்கும் மாணவர்கள் சிலர், மாலை வகுப்பு முடிந்ததும் தங்களது வீடுகளுக்கு நடந்து சென்று கொண்டிருந்தனர்.

அப்போது அந்த வழியே அதிவேகமாக வந்த கார் ஒன்று, ஓட்டுநரின் கட்டுப்பாட்டை இழந்து நடந்து சென்ற மாணவர்கள் மீது பயங்கரமாக மோதியது. இந்த விபத்தில் லோகேஷ் (13), ரக்சித் (12) உட்பட மூன்று மாணவர்கள் சம்பவ இடத்திலேயே துடிதுடித்து உயிரிழந்தனர். தகவலறிந்து வந்த போலீசார் விபத்து குறித்து வழக்குப் பதிவு செய்து விசாரித்து வருகின்றனர்.

இதேபோல, கள்ளக்குறிச்சி மாவட்டம் உளுந்தூர்பேட்டை அருகே மற்றொரு பயங்கர விபத்து அரங்கேறியுள்ளது. உளுந்தூர்பேட்டை மேட்டத்தூர் அருகே, தனியார் பள்ளி மாணவர்கள் 5 பேர் பள்ளி முடிந்து ஒரே இருசக்கர வாகனத்தில் (பைக்) வீடு திரும்பிக் கொண்டிருந்ததாகத் தெரிகிறது.

அப்போது அவர்கள் சென்ற பைக் மீது கார் ஒன்று பலமாக மோதியது. இந்த விபத்தில் ஜஸ்டின் மற்றும் புருனோ ஆகிய இரு மாணவர்கள் சம்பவ இடத்திலேயே பரிதாபமாக உயிரிழந்தனர். மேலும், இந்த விபத்தில் படுகாயமடைந்த ஆலன், சுஜித், அஜய் ஆகிய 3 மாணவர்கள் மீட்கப்பட்டு மருத்துவமனையில் தீவிர சிகிச்சை பிரிவில் அனுமதிக்கப்பட்டுள்ளனர். ஒரே பைக்கில் 5 மாணவர்கள் பயணித்ததே இந்த விபத்தின் தீவிரத்திற்குக் காரணம் என முதற்கட்ட விசாரணையில் தெரியவந்துள்ளது.

பள்ளிப் பருவ விபத்துகள்: பள்ளி முடிந்து வீடு திரும்பிய 5 மாணவர்கள் அடுத்தடுத்து சாலை விபத்துகளில் உயிரிழந்த சம்பவம் தமிழகம் முழுவதும் பெரும் அதிர்ச்சியையும், சோகத்தையும் ஏற்படுத்தியுள்ளது.