நேபாளத்தில் வெள்ளப்பெருக்கின்போது கண்டெடுக்கப்படும் தங்கம், வெள்ளி, பணம் உள்ளிட்ட மதிப்புமிக்க பொருள்களை பொதுமக்கள் தங்களுடைய வசம் வைத்துக்கொள்ளவோ அல்லது விற்கவோ கூடாது என நேபாள காவல்துறை கடுமையான எச்சரிக்கை விடுத்துள்ளது.
கடந்த ஆகஸ்ட் 26 அன்று திபெத் - நேபாள எல்லைப் பகுதியில் ஏற்பட்ட பயங்கர வெள்ளப் பேரழிவில் 1,400-க்கும் மேற்பட்டோர் உயிரிழந்தனர். 5,000-க்கும் மேற்பட்டோர் காணாமல் போயுள்ளனர். பல்வேறு நாடுகளின் உதவியுடன் 13-வது நாளாகத் தீவிர மீட்பு மற்றும் தேடுதல் பணிகள் தொடர்ந்து நடைபெற்று வருகின்றன.
காவல்துறை வெளியிட்ட முக்கிய அறிவிப்பு:
இந்த நிலையில், வெள்ள பாதிப்பு பகுதிகளில் கண்டெடுக்கப்படும் பொருட்கள் குறித்து நேபாள காவல்துறை வெளியிட்டுள்ள அறிக்கையில் தெரிவிக்கப்பட்டுள்ளதாவது:
வெள்ளத்தில் கண்டெடுக்கப்பட்ட தங்கம், வெள்ளி நகைகள், பணம் மற்றும் பிற மதிப்புமிக்க பொருள்களைப் பொதுமக்கள் வைத்திருக்கக் கூடாது.
கண்டெடுக்கப்படும் பொருட்கள் மற்றும் முக்கிய ஆவணங்களை உடனடியாக அருகிலுள்ள காவல் நிலையத்தில் ஒப்படைக்க வேண்டும்.
வெள்ளத்தில் கிடைத்த மதிப்புமிக்க பொருள்களைப் பயன்படுத்துவது, மறைத்து வைப்பது, வாங்குவது அல்லது விற்பனை செய்வது முற்றிலும் சட்டவிரோதமாகும்.
விதிமீறலில் ஈடுபடுபவர்கள் மீது கடுமையான சட்ட நடவடிக்கை எடுக்கப்படும்.
29 பேர் கைது பின்னணி:
நேபாள காவல்துறை இந்த எச்சரிக்கையை நேரடியாக எந்தவொரு குறிப்பிட்ட சம்பவத்துடனும் இணைத்துக் கூறவில்லை என்றாலும், தடிங் (Dhading) மாவட்டத்தில் வெள்ளத்தால் அடித்துச் செல்லப்பட்ட வங்கிப் பாதுகாப்புப் பெட்டியை (Locker) உடைத்து பணத்தைத் திருடியதாகக் கூறப்படும் வழக்கில் 29 பேர் சமீபத்தில் கைது செய்யப்பட்டதைத் தொடர்ந்து இந்த நடவடிக்கை தீவிரப்படுத்தப்பட்டுள்ளது குறிப்பிடத்தக்கது.
