ஆப்கானிஸ்தானுக்கு எதிரான டெஸ்ட் போட்டியில் இந்திய அணியின் அறிமுக வீரராகக் களம் கண்டு, தனது அபார பந்துவீச்சால் 7 விக்கெட்டுகளைக் வீழ்த்தி அசத்திய இடதுகை சுழற்பந்துவீச்சாளர் மானவ் சுதர், டெஸ்ட் கிரிக்கெட்டில் தான் கற்றுக்கொண்ட முக்கியப் பாடங்கள் குறித்து மனம் திறந்துள்ளார்.
இந்தியா - ஆப்கானிஸ்தான் அணிகளுக்கு இடையேயான ஒரே ஒரு டெஸ்ட் போட்டி நியூ சண்டீகரில் நடைபெற்றது. இந்த ஆட்டத்தில் இந்திய அணி பேட்டிங், பந்துவீச்சு என இரண்டிலும் ஆதிக்கம் செலுத்தி, இன்னிங்ஸ் மற்றும் 300 ரன்கள் வித்தியாசத்தில் பிரம்மாண்ட வெற்றியைப் பதிவு செய்தது.
இந்தப் போட்டியின் மூலம் இந்திய டெஸ்ட் அணியில் அறிமுக வீரராக இடதுகை சுழற்பந்துவீச்சாளர் மானவ் சுதர் களமிறங்கினார். எதிரணி பேட்ஸ்மேன்களுக்குத் தனது சுழற்பந்துவீச்சால் சிம்மசொப்பனமாக விளங்கிய அவர், ஒட்டுமொத்தமாக 7 விக்கெட்டுகளைக் கைப்பற்றி அனைவரது கவனத்தையும் ஈர்த்தார். இந்தச் சிறப்பான செயல்பாட்டிற்காக அறிமுகப் போட்டியிலேயே 'ஆட்ட நாயகன்' (Player of the Match) விருதையும் வென்று சாதனை படைத்தார்.
போட்டிக்குப் பிறகு டெஸ்ட் கிரிக்கெட் அனுபவம் குறித்து மானவ் சுதர் பேசியதாவது:
"இந்திய அணிக்காக டெஸ்ட் கிரிக்கெட்டில் விளையாட வேண்டும் என்பது என்னுடைய நீண்ட நாள் கனவு. அதனால், ஆப்கானிஸ்தானுக்கு எதிரான போட்டியில் சிறப்பாக செயல்பட்டது எனக்கு மிகுந்த மகிழ்ச்சியளிக்கிறது.
இந்த டெஸ்ட் போட்டியின் மூலம் நான் கற்றுக்கொண்ட மிகப் பெரிய பாடம் என்னவென்றால், தொடர்ச்சியாக ஒரே இடத்தில் (Line and Length) துல்லியமாக பந்துவீசுவதுதான். டெஸ்ட் வடிவிலான கிரிக்கெட் போட்டிக்கு அதிக அளவிலான பொறுமை தேவை. தொடர்ச்சியான செயல்பாடு மற்றும் பொறுமை ஆகிய இந்த இரண்டும்தான் டெஸ்ட் கிரிக்கெட்டில் மிகவும் முக்கியம் என்பதை நான் இப்போது கற்றுக் கொண்டுள்ளேன்."
டி20 மற்றும் ஒருநாள் போட்டிகளைத் தாண்டி, சர்வதேச டெஸ்ட் கிரிக்கெட்டில் இந்திய அணியின் அடுத்தகட்ட சுழற்பந்துவீச்சு நம்பிக்கையாக மானவ் சுதர் உருவெடுத்துள்ளார் என கிரிக்கெட் விமர்சகர்கள் பாராட்டி வருகின்றனர்.
