"இனிமேலாவது கண்ணியமா கேள்வி கேளுங்க" - செய்தியாளர் சந்திப்பில் எழுந்த கேள்வியால் கொதித்தெழுந்த மாளவிகா மோகனன்!
சென்னை:
"வைரலாக வேண்டும் என்பதற்காகவே அருவருக்கத்தக்க கேள்விகளைக் கேட்கிறார்கள்" எனத் தமிழக ஊடகங்களின் ஒருசில செய்தியாளர்கள் மீது நடிகை மாளவிகா மோகனன் தனது எக்ஸ் (X) பக்கத்தில் மிகக் கடுமையான கண்டனங்களைப் பதிவு செய்துள்ளார்.
இயக்குநர் லோகேஷ் கனகராஜ் இயக்கத்தில் வெளியான 'மாஸ்டர்' திரைப்படத்தில் தளபதி விஜய்யுடன் இணைந்து நடித்ததன் மூலம் தமிழ் ரசிகர்களிடையே பிரபலமானவர் மாளவிகா மோகனன். தற்போது மலையாளம் மற்றும் ஹிந்தித் திரைப்படங்களில் கவனம் செலுத்தி வரும் இவர், சமீபத்தில் சென்னையில் நடைபெற்ற நிகழ்ச்சி ஒன்றில் கலந்துகொண்டார்.
நடிகராக இருந்து தற்போது தமிழகத்தின் முதல்வராகப் பொறுப்பேற்றுள்ள சி. ஜோசப் விஜய் மற்றும் நடிகை த்ரிஷா ஆகிய இருவரையும் தொடர்புபடுத்திச் சமீபகாலமாகச் சமூக வலைதளங்களில் பல்வேறு செய்திகள் உலா வருகின்றன.
இந்தச் சூழ்நிலையில், சென்னையில் நடந்த செய்தியாளர் சந்திப்பில் மாளவிகா மோகனனிடம், “நடிகை த்ரிஷா போல நீங்களும் விஜய்யுடன் பயணிப்பீர்களா?” எனச் செய்தியாளர் ஒருவர் கேள்வி எழுப்பியுள்ளார். இக்கேள்வி மாளவிகாவை கடும் அதிர்ச்சிக்கும் மன உளைச்சலுக்கும் ஆளாக்கியுள்ளது.
"அருவருக்கத்தக்க கேள்விகள்" - எக்ஸ் பக்கத்தில் மாளவிகா ஆவேசம்!
இந்தச் சம்பவம் குறித்துத் தனது எக்ஸ் (ட்விட்டர்) பக்கத்தில் மிக நீண்ட உருக்கமான பதிவு ஒன்றை மாளவிகா மோகனன் வெளியிட்டுள்ளார். அதில் அவர் கூறியிருப்பதாவது
"நேற்று நான் சென்னையில் ஒரு நிகழ்ச்சிக்குச் சென்றிருந்தேன். எனக்குத் தமிழக ஊடகங்கள் மீது எப்போதும் மிகுந்த மதிப்பும் மரியாதையும் இருக்கின்றது. ஆனால், ஒருசிலர் தொடர்ச்சியாக ஒரே மாதிரியான அருவருக்கத்தக்க, எப்படியாவது வைரலாக வேண்டும் என்ற நோக்கத்தில் மட்டுமே கேள்விகளைக் கேட்கிறார்கள்.
தளபதி விஜய்யை எனக்குக் கடந்த 7 ஆண்டுகளாகத் தெரியும். அவர் மீது நான்
அளவற்ற மரியாதை வைத்திருக்கிறேன். அவரை எனது ஒரு நல்ல நண்பர் என்று சொல்லும் அளவுக்கு நான் ஆசிர்வதிக்கப்பட்டவள்."
மேலும் ஊடகங்களுக்கு வேண்டுகோள் விடுத்துள்ள அவர், "அடுத்தமுறை ஊடகங்களைச் சந்திக்கும்போதாவது, செய்தியாளர்கள் கொஞ்சம் மரியாதையுடனும், இத்தகைய கேள்விகளில் பலரது வாழ்க்கை மற்றும் குடும்பத்தினர் சம்பந்தப்பட்டிருக்கிறார்கள் என்ற கவனத்துடனும் கேள்விகளைக் கேட்டால் நன்றாக இருக்கும்," என்று பதிவிட்டுள்ளார்.
முதல்வர் விஜய் மற்றும் த்ரிஷாவை மையப்படுத்தித் தன்னிடம் கேட்கப்பட்ட கிசுகிசு கேள்விக்கு, நடிகை மாளவிகா மோகனன் கொடுத்துள்ள இந்த அதிரடிப் பதில் தற்போது இணையத்தில் பேசுபொருளாக மாறியுள்ளது.