தமிழக முதல்வரும், தமிழக வெற்றிக் கழகத்தின் (தவெக) தலைவருமான விஜய் நடிப்பில் உருவாகியுள்ள 'ஜன நாயகன்' திரைப்படத்தின் வெளியீட்டுத் தேதி குறித்த அதிகாரப்பூர்வ அறிவிப்பு வெளியாவதில் தொடர்ந்து தாமதம் ஏற்பட்டு வருகிறது. இதனால், விஜய் ரசிகர்கள் மற்றும் சினிமா வட்டாரங்கள் மத்தியில் பெரும் எதிர்பார்ப்பும் பரபரப்பும் நிலவி வருகிறது.
விஜய் தமிழக முதல்வராகப் பொறுப்பேற்ற பிறகு வெளியாகும் முதல் திரைப்படம் என்பதால், 'ஜன நாயகன்' படத்திற்கு ஒட்டுமொத்த தமிழகத்திலும் பிரம்மாண்ட எதிர்பார்ப்பு உள்ளது. இதனிடையே, படத்தின் வெளியீட்டுத் தேதியை இறுதி செய்வது குறித்து, தயாரிப்பாளர் வெங்கட் நாராயணா சமீபத்தில் முதல்வர் விஜய்யை நேரில் சந்தித்துப் பேசினார்.
இருப்பினும், தணிக்கைத் துறையின் (Censor Board) சான்றிதழ் பெறுவதில் ஏற்பட்டுள்ள சில சிக்கல்கள் காரணமாகவே படத்தின் வெளியீட்டு அறிவிப்பு தள்ளிப்போவதாகத் தெரியவந்துள்ளது. தணிக்கைச் சான்றிதழ் கிடைத்தவுடன் ரிலீஸ் தேதி அதிகாரப்பூர்வமாக அறிவிக்கப்படும் என தயாரிப்புத் தரப்பில் ஏற்கனவே கூறப்பட்டிருந்தது.
தற்போதைய நிலவரப்படி, தணிக்கை வாரியம் இன்னும் படத்திற்கு சான்றிதழ் வழங்காததால், மே மாதத்தில் படம் வெளியாவது கடினம் என்றே கூறப்படுகிறது. இதனால், 'ஜன நாயகன்' திரைப்படம் ஜூன் மாத வெளியீடாக திரைக்கு வர அதிக வாய்ப்புகள் உள்ளதாக சினிமா வட்டாரங்கள் தெரிவிக்கின்றன.
ஜூன் 22 ஆம் தேதி முதல்வர் விஜய்யின் பிறந்த நாள் என்பதால், அதனை முன்னிட்டு ஜூன் மாதத் தொடக்கத்திலோ அல்லது பிறந்தநாளுக்கு முன்பாகவோ திரைப்படத்தை பிரம்மாண்டமாகத் திரைக்குக் கொண்டு வர படக்குழு திட்டமிட்டு வருவதாகவும் புதிய தகவல் வெளியாகியுள்ளது.
விரைவில் தணிக்கை சிக்கல்கள் முடிவுக்கு வந்து, அதிகாரப்பூர்வ ரிலீஸ் தேதி வெளியாகும் என ரசிகர்கள் ஆவலுடன் காத்துக்கொண்டிருக்கின்றனர்.