ஐக்கிய நாடுகள் அமைப்பின் 81-ஆவது பொது அவைக்கூட்டத்தில் பங்கேற்பதற்காக இஸ்ரேலிய பிரதமர் பெஞ்சமின் நெதன்யாகு அமெரிக்காவின் நியூயார்க் நகரத்தைச் சென்றடைந்துள்ளார்.
அமெரிக்காவின் நியூயார்க் நகரில் நடைபெற்று வரும் ஐ.நா. பொது அவையின் 81-ஆவது கூட்டத்தொடரில் உலக நாடுகளின் தலைவர்கள் மற்றும் பிரதிநிதிகள் பங்கேற்று உரையாற்றி வருகின்றனர். இதன் ஒரு பகுதியாக, இன்று (செப். 24) நியூயார்க் சென்றடைந்த இஸ்ரேல் பிரதமர் பெஞ்சமின் நெதன்யாகு, இந்திய நேரப்படி இன்றிரவு 11.30 மணியளவில் பொது அவையில் உரையாற்றுவார் என எதிர்பார்க்கப்படுகிறது.
அமெரிக்க அதிபர் சந்திப்பு இல்லை:
நெதன்யாகுவின் இந்த நியூயார்க் பயணத்தின் போது, அமெரிக்க அதிபர் டொனால்ட் டிரம்ப்பைச் சந்திப்பதற்கான எந்தவொரு அதிகாரப்பூர்வ ஏற்பாடுகளும் செய்யப்படவில்லை என்று தகவல்கள் தெரிவிக்கின்றன.
ஈரான் அதிபர் உரை:
முன்னதாக, நேற்று நடைபெற்ற கூட்டத்தொடரில் பங்கேற்றுப் பேசிய ஈரான் அதிபர் மசூத் பெஷேஷ்கியன், தங்கள் நாட்டின் மீது அமெரிக்கா மற்றும் இஸ்ரேல் மேற்கொண்டு வரும் தாக்குதல்கள் மற்றும் அச்சுறுத்தல்கள் குறித்துக் கடுமையாகச் சாடியிருந்தார்.
கைது எச்சரிக்கை சர்ச்சை:
காஸா போரில் அரங்கேறிய போர்க்குற்றங்கள் தொடர்பாக சர்வதேச குற்றவியல் நீதிமன்றம் (ICC) பிறப்பித்துள்ள பிடிஉத்தரவின் அடிப்படையில், நெதன்யாகு நியூயார்க் நகருக்குள் நுழைந்தால் அவரைக் கைது செய்வேன் என நியூயார்க் நகர மேயர் ஸோரான் மம்தானி ஏற்கனவே பகிரங்க எச்சரிக்கை விடுத்திருந்தது குறிப்பிடத்தக்கது.
