உலக நாடுகளின் ஒட்டுமொத்த பார்வையும் தற்போது பாகிஸ்தான் தலைநகர் இஸ்லாமாபாத் நோக்கித் திரும்பியுள்ளது. மத்திய கிழக்கில் நிலவி வரும் போர்ச் சூழலை முடிவுக்குக் கொண்டு வர, அமெரிக்கா மற்றும் ஈரானியப் பிரதிநிதிகள் பங்கேற்கும் அமைதிப் பேச்சுவார்த்தை இன்று தொடங்குகிறது.
பதற்றத்தின் உச்சம்
பிப்ரவரி 28: ஈரானின் அணுசக்தித் திட்டத்திற்கு எதிராக அமெரிக்கா-இஸ்ரேல் நடத்திய கூட்டுத் தாக்குதலில் ஈரானின் தலைமை மதகுரு அயதுல்லா அலி கமேனி கொல்லப்பட்டார்.
வளைகுடா நாடுகளின் கட்டமைப்புகள் மீது ஈரான் தாக்குதல் நடத்தியதுடன், சர்வதேச எரிபொருள் போக்குவரத்தின் முக்கியப் பாதையான ஹோர்முஸ் நீரிணையை முடக்கியது.
உலக நாடுகளின் அழுத்தத்தினால் அமெரிக்க அதிபர் டொனால்ட் டிரம்ப் 2 வார கால தற்காலிக போர்நிறுத்தத்தை அறிவித்தார்.
இஸ்லாமாபாத் வந்தடைந்த தலைவர்கள்
பாகிஸ்தான் பிரதமர் ஷாபாஸ் ஷரீஃப் மற்றும் ராணுவத் தளபதி ஆசிம் முனீர் ஆகியோரின் முன்னிலையில் இந்த மத்தியஸ்த பேச்சுவார்த்தை நடைபெறுகிறது.
அமெரிக்க துணை அதிபர் ஜே.டி. வான்ஸ் தலைமையிலான உயர்மட்டக் குழுவினர் இன்று சனிக்கிழமை இஸ்லாமாபாத் வந்தடைந்தனர். அவர்களுக்கு பாகிஸ்தான் துணைப் பிரதமர் இஷாக் தார் உற்சாக வரவேற்பு அளித்தார்.
ஈரானியப் பிரதிநிதிகளும் பேச்சுவார்த்தையில் பங்கேற்க ஏற்கனவே இஸ்லாமாபாத் வந்தடைந்துள்ளனர்.
வாழ்வா - சாவா' கட்டத்தில் பேச்சுவார்த்தை
தற்போது தற்காலிக போர்நிறுத்தம் அமலில் இருந்தாலும், கள நிலவரம் கவலைக்கிடமாகவே உள்ளது
லெபனானின் தெற்குப் பகுதியில் இஸ்ரேல் நடத்திய தாக்குதலில் 13 பாதுகாப்புப் படை வீரர்கள் உட்படப் பலர் கொல்லப்பட்டுள்ளனர். கடந்த மார்ச் மாதத்திலிருந்து மட்டும் பலியானோரின் எண்ணிக்கை 2,000-ஐத் தாண்டியுள்ளது.
:பேச்சுவார்த்தை தொடங்குவதற்கு முன்பே இரு நாடுகளும் பரஸ்பரம் கடும் மிரட்டல்களையும், விட்டுக்கொடுக்க முடியாத நிபந்தனைகளையும் விதித்துள்ளதால், இந்த அமைதி முயற்சி வெற்றி பெறுமா என்ற கேள்வி எழுந்துள்ளது.
எதிர்பார்ப்பு என்ன?
அடுத்த 24 மணி நேரத்தில் எட்டப்படும் முடிவுகள், உலகளாவிய எரிபொருள் விநியோகம் மற்றும் மத்திய கிழக்கின் எதிர்காலத்தைத் தீர்மானிக்கும். இந்தப் பேச்சுவார்த்தை தோல்வியடைந்தால், போர் மீண்டும் தீவிரமடைந்து உலகப் பொருளாதாரத்தில் பெரும் தாக்கத்தை ஏற்படுத்தும் என அரசியல் வல்லுநர்கள் எச்சரிக்கின்றனர்.