அமெரிக்கா மற்றும் ஈரான் இடையே கடந்த 7 மாதங்களாகப் போர் நீடித்து வரும் நிலையில், அமெரிக்கா தொடர்ந்து தாக்குதல் நடத்தினால் உலகமே ஆச்சரியப்படும் வகையில் புதிய ஆயுதங்களைப் பயன்படுத்தி புதிய இலக்குகள் மீது தாக்குதல் நடத்துவோம் என்று ஈரான் பகிரங்க எச்சரிக்கை விடுத்துள்ளது.
இப்போர் காரணமாக இரு தரப்பும் மீண்டும் ஒரு முழு வீச்சிலான போருக்குத் திரும்பத் தயாராக இல்லாத சூழல் நிலவி வந்தாலும், சமீபத்தில் மீண்டும் மோதல்கள் தீவிரமடையும் அறிகுறிகள் தென்படுகின்றன.
புரட்சிகரக் காவல் படை எச்சரிக்கை:
இதுகுறித்து ஈரான் புரட்சிகரக் காவல் படையின் (IRGC) செய்தித் தொடர்பாளர் வெளியிட்டுள்ள அறிக்கையில் குறிப்பிடப்பட்டுள்ளதாவது:
"அமெரிக்கா மீண்டும் எங்கள் மீது தாக்குதல் நடத்தினால், எங்களைப் பாதுகாத்துக் கொள்வதிலும் பதில் தாக்குதல் தொடுப்பதிலும் நிச்சயமாகக் குறிப்பிடத்தக்க மாற்றங்கள் இருக்கும். உலகமே ஆச்சரியப்படும் வகையிலும், போர்க்களத்தில் புதிய திறன்களை வெளிப்படுத்தும் வகையிலும் அதிநவீன புதிய ஆயுதங்களை அறிமுகப்படுத்துவோம்.
நாங்கள் இதுவரை இலக்கு வைத்த இடங்களைப் போல அல்லாமல், முற்றிலும் புதிய இலக்குகள் மீது இந்த முறை தாக்குதல் நடத்துவோம். ஒரு நீண்டகாலப் போரை எதிர்கொள்ள நாங்கள் அனைத்து வழிகளிலும் தயாராக இருக்கிறோம்."
ஹோர்முஸ் நீரிணை மற்றும் ஏமனில் தீவிரமடையும் மோதல்:
ஈரான் மீது புதிய ராணுவ நடவடிக்கைகளை எடுக்க அமெரிக்கா திட்டமிட்டுள்ளதாக ஈரான் ராணுவம் தெரிவித்துள்ளது. கடந்த மாத இறுதியில் மோதல் உச்சமடைந்த நிலையில், சமீப நாட்களில் நேரடித் தாக்குதல்கள் சற்றே குறைந்திருந்தன. இருப்பினும், சர்வதேச வர்த்தகப் பாதையான ஹோர்முஸ் நீரிணையில் வணிகக் கப்பல்கள் மீது ஈரான் அவ்வப்போது தாக்குதல்களை நடத்தி வருகிறது. மேலும், இரு நாடுகளும் ஹோர்முஸ் நீரிணைப் பகுதியை முற்றுகையிட்டுள்ளன.
இதனிடையே, இப்போரின் தாக்கம் ஏமன் நாட்டிற்கும் பரவியுள்ளது. ஏமனில் செயல்பட்டு வரும் ஈரான் ஆதரவு ஹூதி அமைப்பினர், சவூதி அரேபிய ஆதரவு அரசிடமிருந்து மேலும் பல பகுதிகளைக் கைப்பற்றியுள்ளதுடன், சவூதி தலைநகர் ரியாத் உள்ளிட்ட முக்கிய இடங்களில் தீவிரத் தாக்குதல்களை நடத்தி வருகின்றனர்.
