பாலஸ்தீனத்தின் மேற்கு கரையில் இஸ்ரேல் மேற்கொண்டு வரும் ஆக்கிரமிப்பு நடவடிக்கைகள், அங்கு வாழும் பாலஸ்தீன மக்களைத் தனிமைப்படுத்தி முழுமையாக ஒழிப்பதற்கான ஒரு பெரிய திட்டத்தின் பகுதியே என்று இஸ்ரேலை மையமாகக் கொண்டு செயல்படும் 'பிஸெலெம்' (B'Tselem) மனித உரிமைகள் அமைப்பு குற்றம் சாட்டியுள்ளது.
இஸ்ரேலிய ஆக்கிரமிப்புப் பகுதிகளான மேற்கு கரை மற்றும் காஸாவில் நிகழும் மனித உரிமை மீறல்களைக் கண்காணித்து ஆவணப்படுத்தும் பணியை பிஸெலெம் அமைப்பு தொடர்ந்து செய்து வருகிறது.
'ஒழிக்கும் திட்டம்' - அறிக்கையின் முக்கிய அம்சங்கள்: பிஸெலெம் அமைப்பு வெளியிட்டுள்ள 'ஒழிக்கும் திட்டம்' என்ற புதிய அறிக்கையில், பாலஸ்தீன மக்களுக்கு எதிராக இஸ்ரேல் செயல்படுத்தும் 5 பிரதான திட்டங்கள் ஒன்றோடு ஒன்று தொடர்புடையவை என்று குறிப்பிடப்பட்டுள்ளது:
வன்முறை மற்றும் இனச் சுத்திகரிப்பு: பாலஸ்தீன கிராமங்கள் மீதான தொடர் தாக்குதல்கள் மற்றும் கட்டாய இடப்பெயர்வுகள்.
மக்கள் நடமாட்டக் கட்டுப்பாடுகள்: பாலஸ்தீனர்களின் சுதந்திரமான போக்குவரத்தைத் தடுக்கும் சோதனைக் சாவடிகள் மற்றும் தடைகள்.
பொருளாதாரத் தடை: பாலஸ்தீனர்களின் வாழ்வாதாரத்தையும் வணிகத்தையும் முடக்கும் நிதி மற்றும் பொருளாதாரக் கட்டுப்பாடுகள்.
சமூக அழிப்பு: பாலஸ்தீனர்களின் சமூகக் கட்டமைப்பு மற்றும் குடும்ப உறவுகளைச் சிதைக்கும் நடவடிக்கைகள்.
அரசியல் அழிப்பு: பாலஸ்தீன மக்களுக்கான இறையாண்மை மற்றும் அரசியல் உரிமைகளை முழுமையாக மறுத்தல்.
பிஸெலெம் அமைப்பின் அறிக்கை குறித்து நிர்வாக இயக்குநர் யூலி நோவாக் செய்தியாளர்களிடம் தெரிவிக்கையில்:
"பாலஸ்தீனர்கள் ஒரு சமூகமாகவோ, தேசிய இனமாகவோ இங்கு தொடர்ந்து வாழ்வதற்குத் தேவையான அடிப்படைச் சூழலை இஸ்ரேலின் இந்த 5 திட்டங்களும் முழுமையாகச் சிதைக்கின்றன. இதை குடியேற்ற காலனித்துவத் திட்டம் (Settler-colonial project) என்று நாங்கள் விவரிப்பது, இந்த நிலத்துடனான யூதர்களின் வரலாற்றுத் தொடர்பை மறுப்பதற்காக அல்ல; மாறாக, தற்போதைய இஸ்ரேலிய அரசின் அரசியல் திட்டங்களின் உண்மைத் தன்மையை உலகுக்கு வெளிப்படுத்தவே," என்று குறிப்பிட்டார்.
இந்தக் கடுமையான குற்றச்சாட்டுகள் மற்றும் பிஸெலெம் அமைப்பின் அறிக்கை குறித்து இஸ்ரேலிய அரசு அதிகாரிகளோ அல்லது ராணுவத் தரப்போ இதுவரை எந்தக் கருத்தும் தெரிவிக்கவில்லை.
