அமெரிக்காவின் மியாமி சர்வதேச விமான நிலையத்தில், அமேசான் பிரைம் ஏர் சரக்கு விமானம் தரை இறங்கும்போது ஓடுபாதையைத் தாண்டிச் சென்று விபத்துக்குள்ளானதில் 5 பேர் உயிரிழந்தனர். 5 பேர் காயமடைந்தனர்.
பியூர்டோ ரிக்கோவின் சான் ஜுவான் நகரிலிருந்து மியாமிக்கு வந்த ‘21 ஏர்’ நிறுவனத்தால் இயக்கப்படும் போயிங் 767 ரக அமேசான் பிரைம் ஏர் சரக்கு விமானம், ஞாயிற்றுக்கிழமை மியாமி விமான நிலையத்தில் தரையிறங்க முயன்றது. அப்போது எதிர்பாராதவிதமாக வேகத்தைக் கட்டுப்படுத்த முடியாமல், ஓடுபாதையைத் தாண்டிச் சென்று அருகில் இருந்த வாகனங்கள் மீது மோதி விபத்துக்குள்ளானது.
தீ தீவிரமாகப் பரவியது
மோதிய வேகத்தில் விமானம் தீப்பற்றி எரியத் தொடங்கியதால் அப்பகுதி முழுவதும் அடர்ந்த கருப்புகை சூழ்ந்தது.
தகவல் அறிந்து மியாமி-டேட் தீயணைப்பு மற்றும் மீட்புப் படையைச் சேர்ந்த 60-க்கும் மேற்பட்ட வாகனங்களும், 200-க்கும் மேற்பட்ட மீட்புப் பணியாளர்களும் சம்பவ இடத்திற்கு விரைந்தனர்.
விபத்தில் 5 பேர் உயிரிழந்த நிலையில், காயமடைந்த 5 பேர் உடனடியாக மருத்துவமனையில் அனுமதிக்கப்பட்டனர். அதில் 3 பேரின் நிலைமை கவலைக்கிடமாக உள்ளது.
விபத்தைத் தொடர்ந்து, பாதுகாப்பு கருதி விமான நிலையத்தின் அனைத்து ஓடுபாதைகளும் மூடப்பட்டு விமான சேவைகள் தற்காலிகமாக நிறுத்தப்பட்டன.
விசாரணை தீவிரப்படுத்தல்
இந்த விபத்து குறித்து அமேசான் நிறுவன செய்தித் தொடர்பாளர் கெல்லி நாண்டெல் கவலை தெரிவித்ததுடன், அதிகாரிகளுக்கு முழு ஒத்துழைப்பு அளிக்கப்படும் எனக் கூறினார்.
தற்போது இந்த விபத்து தொடர்பாக அமெரிக்க மத்திய விமானப் போக்குவரத்து நிர்வாகம் (FAA) மற்றும் தேசிய போக்குவரத்து பாதுகாப்பு வாரியம் (NTSB) ஆகிய அமைப்புகள் விரிவான விசாரணை மேற்கொண்டு வருகின்றன.
